Social

बालमैत्री स्थानिय शासन कार्यक्रम घोषणा गर्दै चाँगुनारायण नगरपालिकाका मेयर मिश्र

शनिबार, पुस २४, २०७८

विकासप्रेमी, समाजसेवी, स्पष्टवक्ता, जनप्रिय व्यक्तित्व तथा फराकिलो सोचका धनी भक्तपुरको चाँगुनारायण नगरपालिकाका मेयर सोमप्रसाद मिश्र २०३६ सालदेखि नै राजनीतिमा सक्रिय सहभागिता जनाउँदै आएका छन्। निडर स्वभावका मिश्र कामलाई पहिलो प्राथमिकतामा राख्नुपर्छ भन्ने मान्यता राख्छन्। छोरा र छोरी बराबर भनिएपनि त्यो व्यवहारमा लागू हुन नसकेको र बताउँने मिश्र जब छोरी सक्षम हुन्छिन् तब मात्र घर, परिवार र समाज समृद्ध बन्न सक्ने बताउँछन्।

राजनीतिलाई निकै नजिकबाट बुझेका मिश्र भन्छन्,"राजनितिमा पनि पहिला र अहिलेको अवस्थामा धेरै परिवर्तन आएको छ। नीति–नियम, ऐन–कानून बनेकाले काम गर्न केही हदसम्म सजिलो भएको छ। त्यसो त पहिला पनि नीति–नियम नबनेको होइन तर, अवस्थामा परिवर्तन भएको छ।"

विसं.२०७४ सालमा जननिर्वाचित भएर आएपछि योजना अनुसार ९० प्रतिशत काम चाँगुनारायण नगरपालिकामा भइसकेको मेयर मिश्रको दाबी रहेको छ। चाँगुनारायण नगरपालिकामा १३ हजार घरधुरीमा प्रत्येक घरमा एक घर–एक धारा भन्ने योजना अनुसार अब केही घरधुरी अर्थात् १ हजार घरधुरीमा मात्र खानेपानीको धारा वितरण हुन बाँकी रहेको छ।

त्यस्तै गरी सडक निर्माणतर्फ एक वडा एक सडक कालोपत्रे गर्ने योजना अनुसार प्रत्येक वडामा दुई दुई वटा सडक कालोपत्रे भएको छ। त्यसलाई पनि उपलब्धी मान्न सकिने ठहर मेयर मिश्रको रहेको छ । 

एक वडा एक स्वास्थ्य चौकी, एक वडा एक एम्बुलेन्स त्यसै गरी चाँगुनारायण अस्पतालको पनि निर्माण भएको छ। एक वडा एक खेल मैदान भन्ने योजना अनुसार खेल मैदान पनि निर्माण भएको मेयर मिश्रले अन्तरवार्ताको क्रममा बताएका छन्। यद्यपि महिला र बालबालिकाको लागि पनि विभिन्न किसिमका कार्यक्रमहरु ल्याएको मेयर मिश्र बताउँछन्।

बालमैत्री स्थानिय शासन कार्यक्रम अब फागुनमा घोषणा गर्दैछौं। सम्भवत् यो काठमाडौं उपत्यकाकै पहिलो कार्यक्रम हो भनेर दावी गर्न पनि मेयर मिश्र चुकेनन्। त्यसो त चाँगुनारायण नगरपालिका नेपालकै पहिलो नगरपालिका हो, जहाँ ५ वर्ष देखि १४ वर्षसम्मका बालबालिका जसलाई स्कूल एज भन्छन् शत्प्रतिशत बालबालिकालाई बिद्यालयमा भर्ना गराउन सफल भएको छ। कुनै पनि बालबालिका स्कूल जानबाट वञ्चित हुनु परेको छैन।

त्यसमा पनि बचत खाता छोरीको सुरक्षा जीवनभरीको भन्ने कार्यक्रम अघि सारेका छौं। प्रत्येक सामुदायिक स्कूल पढ्ने बालिकाको नाममा वचत खाता खोलेका छौं। हरेक वर्षमा त्यसमा खातामा नगरपालिकाले ४/४ हजार रकम जम्मा गरिदिन्छ। त्यो रकम २० वर्ष पूरा भएपछि अर्थात् ती बालिकाहरुले १२ कक्षा पास गरेपछि मात्र रकम झिक्न पाउँछन्।

यस कार्यक्रमको मुख्य उद्धेश्य भनेको प्रत्येक बालबच्चा पढ्नबाट वञ्चित नहोउन्, बालविवाह नहोस् र यस नगरपालिकाका प्रत्येक बालिकाहरु जसले कम्तिमा पनि १२ पास गरुन् भन्ने जस्ता विभिन्न उद्धेश्यहरु रहेका छन्। हरेक कामको लागि स्थानिय सर्वसाधारणको उत्तिकै साथ र सहयोग उत्तिकै रहेको मेयर मिश्रले बताए। 

-नामी साप्ताहिकबाट



Published Date: 2022-01-08 10:37:00
Nepal Airlines
Comments
Nepal Telecommunication Authority