Social

प्राधिकरणका सवस्टेशन प्रमुख १ लाख ४० हजार घुससहित पक्राउ

Nami News
बिहीबार, पुस २९, २०७८

काठमाडौ । नेपाल विद्युत् प्राधिकरणले सेवाग्राहीलाई सहजरूपमा सेवा दिने भन्दै पटक-पटक सार्वजनिक प्रतिबद्धता जनाएको छ। कुनै पनि काम ७ दिनभित्र सम्पन्न गर्ने नीतिगत व्यवस्था पनि गरेको छ। 

प्राधिकरणका कार्यकारी निर्देशक कुलमान घिसिङले सेवाग्राहीसँग कुनै पनि अनावश्यक माग नराख्न तथा हुने काम हुने भन्न, नहुने काम अहिले हुँदैन भन्ने निर्देशन दिए पनि कर्मचारीले भने अटेर गरेर घुस लिएको पाइएको छ।

अख्तियार दुरुपयोग अनुसन्धान आयोगले आज प्राधिकरण काठमाडौँ ग्रीड महाशाखा सवस्टेशन पाटन ललितपुरमा कार्यरत सवस्टेशन प्रमुखलाई १ लाख ४० हजार घुससहित पक्राउ गरेको छ। 

सवस्टेशन प्रमुख सोमप्रसाद पहाडीले प्राधिकरणले गाडेको बिजुलीको पोल सार्नका लागि सेवाग्राहीसँग घुस मागेको भन्ने सूचनाका आधारमा आयोगको टङ्गालबाट गएको टोलीले पक्राउ गरेको हो।

आयोगका प्रवक्ता नारायणप्रसाद रिसालका अनुसार पहाडीलाई घुस लिँदै गरेको अवस्थामा कार्यालय परिसरबाट पक्राउ गरेको हो। आरोपी पहाडीको थप अनुसन्धान भइरहेको छ। 
 



Published Date: 2022-01-13 21:02:00
Nepal Airlines
Comments
Nepal Telecommunication Authority