- श्याम स्मृत
कोरोनाको महामारीको दोश्रो लहर नेपालमा फैलिएपछि त्यसलाई चेनब्रेक गर्ने नाममा लकडाउन गरिएको छ । लकडाउनको कुनै विकल्प नरोजिकन तत्काल लकडाउन भएयता अधिकांश मानिसमा डर पैदा भएको छ। डरै डर तथा मानसिक तनाबका कारण धेरैको ज्यान गएको छ ।
कोरोनाको पहिलो लहरमा कम जोखिम देखिएका बालबालिका, युवादेखि बृद्धबृद्धामा पनि कोरोना संक्रमित हुनेदेखि, उपचार नपाउँने, ज्यानै जानेसम्मको डरले सताएको छ । डरका कारणले गर्दा उनीहरु अस्पतालमा जाँच एवं परामर्शका लागि पुग्ने गरेका छन् । अस्पतालको भीडम भीड अवस्थामा तथा भर्ना हुनका लागि बेड नपाउने तथा पाएमा पनि अक्सिजनको अभाव जस्ता विविध समस्या देखिएपछि निको हुनका लागि अस्पताल गएकाहरु पनि कति त लाश भएर फर्केको पाइएको छ ।
यथार्थमा कोरोना संक्रमणको कारण भन्दा पनि बढी डरै डरको कारण ज्यान गएको छ। यो कुरा जगजाहेर भएतापनि स्वास्थ्य स्थिति मजबुत नभएको हाम्रो देश नेपालमा कसैको उपचार नपाएर ज्यान गएमा सजिलो भाषामा कोरोना संक्रमणका कारण वित्यो भनेर सरल ढंगवाट भन्ने बानी हुन थालेको छ । जुन दुःखद अवस्था हो । सरकार कोरोना संक्रमणलाई न्यून गर्न तथा संक्रमितको उपचारको लागि गंभीर भएर लाग्न सकेको अवस्था छैन् ।
सरकार कुर्सी जोगाउन तथा तानातानको राजनीतिमा व्यस्त बनेको अवस्थामा आफूहरुलाई सत्तामा अमूल्य मतदान मार्फत पुर्याउँने नेपाली जनताको उपचार गर्न र गराउन चुकिरहेको प्रष्ट छ । दुई हप्ताभन्दा बढी समयदेखि नेपाली जनतालाई कोरोनाको त्रास देखाएर घरभित्रै लकडाउन गराएर बस्न बाँध्य बनाएको छ । ती जनताको घरमा चुल्हो राम्रोसंग बलेको छ या छैन भन्ने कुनै खोजखवर सरकारले गरेको पाइएको छैन् ।
अझ भनौं भने, कोरोनावाट बचाउने नामवाट लकडाउन गरिरहेको सरकारले भोको पेटमा पटुकी बाँधेर चुपचाप बसेका कैयन नेपाली जनतालाई राहत दिने नाममा एक शव्द पनि बोलेको पाइएको छैन् । जुन अत्यन्त विडम्बना हुन पुगेको छ। लकडाउनको विकल्प केवल लकडाउन मात्र भन्न जानेको सरकारले कोरोना महामारीको दोश्रो चरणको लकडाउनको दोश्रो हप्तावितिसक्दा पनि एक गेडा अन्न पनि राहत दिएको पाइएको छैन् ।
यहाँ रोगले भन्दा भोकले मर्ने भैसकेको छ। कोरोना रोग त एकातिर छदैछ । त्यही कोरोनाको नाममा जारी लकडाउनमा लकडाउन मात्र गरेर नेपाली जनतालाई मनोरोगी बनाउंदै लगेको छ । त्यो मनोरोगवाट मुक्ति दिने हो भने, सारा नेपाली जनतालाई राहत प्याकेज दिएर मनोदशाको अन्त्य गर्न र गराउन आवश्यक छ । मनोदशा अर्थात मनोरोग हटेमा स्वभाविक रुपमा आत्मबल बृद्धि भएर कोरोना संक्रमण निर्मूल बन्नेथियो ।
प्रकाशित मिति: शुक्रबार, वैशाख ३१, २०७८ १८:२०
