काठमाडौ । पुस्तकप्रेमीहरुको समूह बुकाहोलिक्सको आयोजनामा शनिवार नेपालको भूगोलभित्र लेखिएका साहित्य मात्र नेपाली साहित्य नभएर नेपालको भुगोल बाहिर लेखिएका साहित्य पनि नेपाली साहित्य नै हो भन्ने साश्वत सत्य कुरालाई महत्व दिएर एउटा कार्यक्रम एक समारोहवीच सम्पन्न भएको छ ।
शरद प्रधानव्दारा साहित्यकारहरु इन्द्रवहादुर राई, लैनसिंह वाङ्देल, पारिजात र नेपाली साहित्यले विर्सिएको जगत राई जस्ता मूर्धन्य साहित्यकारहरु लगायत ४२ जना भारतमा बसोबास गरी नेपाली साहित्यको सिर्जना गर्ने व्यक्तित्वहरुको बारेमा लेखिएको स्मृतिविम्ब नामक पुस्तकका बारेमा समालोचना गर्ने उद्देश्यले उक्त कार्यक्रमको आयोजना गरिएको थियो ।
चकटी बहस नाम दिएर आयोजित कार्यक्रममा सर्वप्रथम सगुना शाहले सबैलाई स्वागत गर्दै बडादशैंको शुभकामना दिएर चर्चित लेखक अमोददेव भट्टराईलाई पुस्तकको बारेमा समालोचना गर्न अनुरोध गरेकी थिइन् ।
बासुदेव भट्टराई, हस्ताक्षर, म सित पनि दुख्ने घाउ छ, छातिमा टाप राखेर र अंग्रेजीमा अनुवादित पुस्तक च्याप्टर जस्ता लोकप्रिय पुस्तकहरुका लेखक अमोददेव भट्टराईले स्मृतिविम्वका लेखकको प्रशंसा गर्दै कितावले असल सूचना प्रदान गरेको र तथ्यगत कुराको जानकारी दिएर पढ्नलाई उत्साह बढाएकोले लेखक शरद प्रधानमा पाठकहरुको ध्यान खिच्न सक्ने आकर्षक शक्ति भएको बताए ।
साथै उनले पुनरलेखन र सम्पादन यो पुस्तकमा राम्रोसँग हुन सकेको भए सुनमा सुगन्ध हुने थियो भन्दै पुस्तकको साजसज्जा, लेखन, प्रकाशनको स्तरियता, व्याकरण र भाषामा भएका कमी कम्जोरीहरु औंल्याएर उदाहरण दिँदै मीठो दालभात तरकारी खाइरहेको वेला ढुङ्गा आए जस्तो भएको छ यो पुस्तक भनेर व्यङ्ग्यात्मक शैलीमा पुस्तकको विवेचना गरेका थिए । पुस्तकका लेखक शरद प्रधानले अमोददेव भट्टराईसँग आफू शतप्रतिशत सहमत भएकोले पुस्तकमा सम्पादन र पुनरलेखनको अभाव आफूलाई पनि खड्किएको स्वीकारेका थिए ।
कार्यक्रममा सहभागी मध्ये केहीले पुस्तकका लेखकलाई पुस्तकका बारेमा आ–आफ्नो जिज्ञाशा मेटाउँन विभिन्न प्रश्नहरु पनि शोधेका थिए। अन्तमा सगुना शाहले सबैलाई धन्यवाद दिँदै कार्यक्रम समापन भएको घोषणा गरेकी थिइन्।
अनि याे पनि :
नामाी साप्ताहिक
प्रकाशित मिति: शनिबार, असोज १५, २०७९ ०७:५५
