नारायणगढ । मौसममा आएको परिवर्तनसँगै ‘एडिनो भाइरस कन्जङ्गटिवाइटिस’ का कारण जिल्लामा आँखा पाक्ने समस्याको प्रकोप बढेपछि भरतपुर आँखा अस्पतालमा बिरामीहरुको भीड बढेको छ ।
अस्पतालमा बिरामीहरु बिहानैदेखि उपचार गराउन आएपछि भीड हुन थालेको हो ।
अस्पतालका बरिष्ठ प्रशासक दयाशंकर चौधरीका अनुसार अन्य समयभन्दा यो समयमा अस्पतालमा बिरामीको चाप पचास प्रतिशतले बढेको छ।
बिरामीमध्ये आँखा पाकेर उपचार गराउन आउनेको संख्या ७० प्रतिशत रहेको उनले जानकारी दिए । उनले भने “बिरामीको चाप बढेपछि अस्पतालमा भीड लागेको छ।” उनले विगतका दिनहरुमा दैनिक आठ नौ सय बिरामी आउने गरेको भन्दै आइतबारको बिहानैदेखि बिरामीको चाप हेर्दा यो संख्या दोब्बर हुन सक्ने बताए । उनले अस्पतालले सबैलाई सहज तरिकाले उपचार र परामर्श दिएको जानकारी दिए ।
अस्पतालका आँखा रोग विशेषज्ञ डा कुमुदिनी सुवेदीले आँखा पाक्ने रोग फैलिन नलिन व्यक्तिगत सरसफाई र सामाजिक दुरी अपनाउनुपर्ने बताए। उनले यो रोग एक व्यक्तिबाट अर्कोमा सजिलै सर्ने हुँदा रोग लागेको बिरामीको सम्पर्कमा जान नहुने जानकारी दिए।
विशेषत वर्षा मौसम र मौसम परिवर्तनको समयमा यस्ता भाइरसजन्य रोगले सताउने भन्दै रोगबाट बच्नु नै उत्तम उपाय भएको बताउँदै उनले भने, “यो भाईरल इन्फेक्सन हो त्यसैले यसको लक्षणको आधारमा उपचार गर्ने हो । चिसोले सेक्ने, आशुजन्य औषधि राख्ने हो।” उनले आँखा पाकेमा जथाभावी एन्टीबायोटिक औषधिहरु प्रयोग नर्गन समेत सुझव दिएको छ।
डा सुवेदीले आँखा पाक्ने रोग लागेमा मेडिकलबाट जथाभावी औषधि खरिद गरेर प्रयोग नगर्न सुझाव दिंदै चिकित्सकको परामर्शपछि मात्रै औषधिको प्रयोग गर्नुपर्ने बताए ।
चितवनसहितका देशैभरी यो समयमा आँखा पाक्ने रोग निकै बढेर गएको छ । जिल्लाका कतिपय पालिकामा यसको प्रकोप बढेपछि शिक्षण संस्था समेत बन्द गरिएको छ।
प्रकाशित मिति: आइतबार, साउन २१, २०८० १५:१६
