भरतपुर । पूर्वमन्त्री तथा चितवन क्षेत्र नम्बर तीनका सांसद विक्रम पाण्डेले नारायणी नदिको कटान क्षेत्रको स्थलगत निरीक्षण गरेको छ।
पाण्डेले आइतबार पश्चिम चितवनमा नारायणी नदीले कटान र तटबन्धन भएको क्षेत्र निरीक्षण गरेको हो । निरीक्षणका क्रममा सांसद पाण्डेले नारायणी नदीको व्यवस्थापनको काम सन्तोषजनक भएको बताए। ।
उनले नदीले कटान गरेको नयाँ क्षेत्र समेत अनुगमन गरे । ‘पुरानो कटान त समपन्न गर्नु नै छ । नयाँ कटान गरेको क्षेत्रमा अर्को साल बजेट पार्ने लक्ष्यका साथ अवलोकन गरेको हुँ, उनले भने ।’
नारायणी नदीमा जथाभावि ढुंगा, गिट्टी उठाउँदा चितवनको बस्ती तर्फ नारायणी बगेको उनले बताउए। आगामी दिनदेखि नारायणीको बगर उठाउन दिन नहुने उनले बताए ।
‘चितवन तर्फ लाखौँ ट्रिप बगर उठाएर यस्तो भएको हो। आगामी १० बर्ष यहाँको ढुङगा गिट्टी जनताले उठाउन नदिने हो भने पहिलेकै अवस्थामा नारायणी बग्छ,’ उनले भने, ‘नत्र भने पश्चिम चितवन नै सकिन्छ ।’ उनले २०५६ सालदेखि नारायणी नदीको तटबन्धको विषय उठाएको बताए।
आगामी दिनमा आफु नै आएर नदी दोहन गर्न नदिने उनले उद्घोष गरे । ‘अब नारायणीको ग्राबेल उठाइयो भने तटबन्धनले पनि धान्दैन,’ उनले भने ‘यसमा जनता आफै लाग्नुपर्छ । नभए म आफै आएर भएपनि ग्राबेल उठाउन दिँदैन।’
अहिले नारायणी तटबन्धनको काम धमाधम भएको छ । सरकारले करिव २ अर्वको लगानीमा नदी तटबन्धनको काम गरिरहेको छ। नारायणी नदी व्यवस्थापन आयोजनाका सिनियर डिभिजन इन्जिनियर शेखरनाथ न्यौपानेले तीन बर्षको ठेक्का सम्झौता भएर काम भइरहेको बताए।
उनले विभिन्न प्याकेज अनुसार १५ देखि ३५ प्रतिशत काम सम्पन्न भएको जानकारी दिए । उनले नदीले बढि कटान गरेको क्षेत्रलाई प्राथमिकतामा राखेर तटबन्धनको काम भइरहेको न्यौपानेले बताए ।
प्रकाशित मिति: सोमबार, भदौ ४, २०८० १६:१३
