मुस्ताङ । मुस्ताङको थासाङ गाउँपालिका-३ र ५ को सिमाना भएर बग्ने कालीगण्डकी नदीमा मोटेरबल पुल निर्माण शुरु भएको ८ वर्ष वित्यो तर पनि पूरा हुन सकेको छैन्।
पाँचौ पटक ठेक्का सम्झौताको म्याद थप भएको यो पुलको हालसम्मको भौतिक प्रगति ३० प्रतिशत मात्र पूरा भएको हो। एक सय मिटर लामो केवल स्टेट प्रविधिको मोटरेबल पुल निर्माणका लागि वि.स. २०७३ भदौ २२ गते तत्कालीन जिल्ला विकास समिति मुस्ताङ र स्वच्छन्द निर्माण सेवाबीच सम्झौता ठेक्का सम्झौता भएको थियो।
योजनाको निर्माण अवधिसँगै लागत पनि बढेर पछिल्लो पटक भेरियस अर्डर गरी रु. १४ करोड १९ लाख ६५ हजार ८८१ पुुगेको पूर्वाधार विकास कार्यालय मुस्ताङले जनाएको छ।
कुुञ्जोतर्फको पिल्लर कालीगण्डकीको बाढीले गत साउनमा कटान गरेर जोखिम बनाएको पूर्वाधार विकास कार्यालय मुस्ताङका प्रमुख अजय श्रेष्ठले बताए।
डिजाइनको समस्याले २ वर्ष रोकिएको यो पुुल निर्माणको काम संघीयता कार्यान्वयनपछि प्रदेश सरकारलाई हस्तान्तरण भएको थियो। मोटरेबल पुल नहुँदा लेते–कुञ्जो सडकमा बर्खामा सवारी साधन आवत जावत अवरुद्ध हुने र मोटरसाइकल झोलुङ्गे पुलबाट तार्ने गरिएको छ।
कुञ्जो, ताउलुङ, टिटी, देउरालीका १ सय ५० भन्दा बढी घरधुरी लाई आवत जावतमा असुविधाका साथै आलु लगायत गाउँमा उत्पादन भएको कृषि उपज निकासीमा समस्या भएको छ।
निर्माणाधिन छायो–कुञ्जो जोड्ने मोटरेबल पुलको निरिक्षण गरेका भौतिक पूर्वाधार विकास तथा यातायात व्यवस्था मन्त्री रेशम बहादुर जुग्जालीले निर्माण व्यवसायीलाई काममा फर्काउन ताकेता भइरहेको र काम नगरे कारबाहीसँगै ठेक्का तोडेर पुल निर्माणलाई पूर्णता दिने उनले बताए।
एल.आर.डि.पी.का विज्ञहरुको टोलीले हालै सो पुलको निरिक्षण गरेको र टोलीको सुझावको आधारमा जोखिम न्युनीकरण तथा पुल संरक्षणको काम गर्ने तयारी भएको भौतिक पूर्वाधार विकास तथा यातायात व्यवस्था मन्त्रालयले जनाएको छ।
प्रकाशित मिति: मंगलबार, मंसिर ५, २०८० १५:४५
