ललितपुर । वागमती प्रदेशका सांसद शैलेन्द्र बज्राचार्यले अब चाँडै नै वागमती प्रदेशमा नेपालभाषा र तामाङ भाषा कामकाजी भाषाको रुपमा प्रयोगमा आउने बताएका छन्।
ललितपुरमा आयोजित एक कार्यक्रममा बोल्दै सांसद बज्राचार्यले प्रदेशमा भाषा सम्वन्धि विधेयक पारित भइसकेको अवस्थामा अब चाँडै कार्यान्वयनमा आउने बताएकाे हाे।
कार्यक्रममा सांसद बज्राचार्यले कन्फराक्टीभ मिडिया सोलुसनको कन्फराक्टीभ हलको उद्घाटनको साथमा नेपालभाषाको न्यूज पोर्टल ebukhan.com को शुभारम्भ गरेका हुन्।
सोही कार्यक्रममा बोल्दै बज्राचार्यले विधेयक सजिलै पारित भएको नभई धेरै जनाले धेरै संघर्ष र योगदान गरेको र भाषा सम्वन्धि विधेयक कार्यान्वयनमा ल्याउन स्थानीय संचारमाध्यमको पनि उत्तिकै सक्रिय भूमिकाको आवश्यकता रहेको विचार राखेका थिए।
‘गणतन्त्र, लोकतन्त्रमा यो विधेयक सजिलै पारित भएको जस्तो लाग्ला, जुन होइन। अब यसलाई कार्यान्वयनमा ल्याउन स्थानीय समाज र स्थानीय संचार माध्यमले पनि सक्रिय भूमिका खेल्नु आवश्यक छ’ बज्राचार्यले भने।
अब स्थानीय नेपालभाषा प्रदेशको कामकाजी भाषा बन्ने अवस्थामा नेपालभाषाका संचारमाध्यमहरुले पनि व्यावसायिक रुपमा अघि बढ्न स्पष्ट योजना बनाउन आग्रह गर्दै यसमा आफुले सक्दो सहयोग गर्ने प्रतिवद्धता पनि जनाएका थिए।
कार्यक्रममा कन्फराक्टीभ मिडिया सोलुसनका अध्यक्ष बिराजकाजी राजोपाध्यायले स्थानीय विषयवस्तुको उठान र नयाँ खोजीका लागि कन्फराक्टीभ हललाई सम्वाद र अन्तरक्रियाको थलोको रुपमा विकास गर्ने बताए।
मूलधारका भनिएका ठुलठुला मिडियाको आँखामा नपर्ने स्थानीय आवाज, मुद्दा र विषयवस्तु समाचारडेस्क र ईबुखँको मेन न्यूज बन्ने अध्यक्ष राजोपाध्यायको भनाई हो।
‘विगत ६ वर्षदेखि चलाउँदै आएको नेपाली न्यूज पोर्टल समाचारडेस्कको प्राथमिकता स्थानीय विषयवस्तु नै थियो, अब ईबुखँले स्थानीय विषय स्थानीय भाषामै सम्प्रेषण गर्छ। यी दुई डिजिटल डबलीको साथै कन्फराक्टीभ हल भौतिक रुपमा भेला भई स्थानीय विषयवस्तुमाथि सम्वाद, अन्तरक्रियाको लागि प्रयोग गरिनेछ’ राजोपाध्यायले भने।
ईबुखँका सम्पादक विशाल राजभण्डारीले स्थानीय मुद्दा, विषयवस्तुलाई सशक्त ढङ्गले सम्प्रेषण गर्न स्थानीय समाजको सक्रिय सहयोगको लागि आग्रह गरेका थिउ।
‘ईबुखँ आज बल्ल सुरु भएको छ, धेरै बोल्नु केही छैन। स्थानीय विषयवस्तु, मुद्दालाई सशक्त ढंगले सम्प्रेषण गर्न आउनुस्, हामी सबै सँगै अघि बढौं’ सम्पादक राजभण्डारीको भनाई हो।
कार्यक्रममा विभिन्न संचारमाध्यममा आवद्ध पत्रकार, संचारकर्मी, विभिन्न संघसंस्थाका प्रतिनिधि, अभियानकर्मी, समाजसेवी लगायतको उपस्थिती थियो ।
कन्फराक्टीभ मिडिया सोलुसनले विगत ६ वर्षदेखि नेपाली न्यूज पोर्टल समाचारडेस्क संचालन गर्दै आएको छ, जसमा बिराजकाजी राजोपाध्याय सम्पादक छन्। अहिले नेपालभाषाको न्यूज पोर्टल ebukhan.com संचालन गरेको छ। यस न्यूज पोर्टलमा बिशाल राजभण्डारी सम्पादक छन्।
