काठमाडौ । महालक्ष्मी विकास बैंकद्वारा महोत्तरी आगलागि पिडितलाई राहत सामाग्री वितरण गरेको छ ।
बैंकले यहि २०८१ साल बैशाख १२ गते बुधबार महोत्तरीको मटिहानी नगरपालिका-६ मा आगलागीका कारण घरबारविहीन भएका १ सय ५० घर परिवारका लगभग ५ सय ४५ जनाका लागि राहत सामाग्री वितरण गरेको हो ।
बैंकले राहत वितरण गर्ने उद्देश्यले संस्थागत सामाजिक उत्तरदायित्व अन्तर्गत रहीे २ लाख ५० हजार रुपैँया बराबरको ७ सय ५० केजी आँटा, ७ सय ५० केजी चामल, ७५ केजी दाल, ७५ लिटर तेल, १ सय ५० प्याकेट नून, ४ सय ५० वटा नुहाउने र लुगा धुने साबुन र १ सय ५० काटुन चाउचाउ लगायतका खाद्यान्नहरु सहयोग गरेको हो ।
बुधबार मटिहानी नगरपालिका–६ मा लागेको उक्त आगोले एक सयभन्दा बढी घर पूर्णरूपमा जलेर खरानी भएकाछन् भने ५० जति अन्य घरमा क्षति पुगी १५ करोडभन्दा बढीको धनमाल क्षति भएको अनुमान गरिएको छ ।
बैंकले १५ गते शनिवारका दिन मटिहानी नगरपालिकाका मेयर हरिप्रसाद मण्डल र बैंकको मधेस प्रादेशिक कार्यालयका प्रमुख सुदिप चन्द्र पोखरेलले जनकपुर शाखाका कर्मचारीहरुको सहभागितामा पिडित परिवारहरुलाई उक्त राहत सामाग्री हस्तान्तरण गरेको हो ।
बैंकले प्रदान गरेको सहयोगले यस असहज परिस्थितिमा उक्त परिवारहरुको आधारभूत आवश्यकता पूरा गर्न थोरै भएपनि मद्दत पुग्ने विश्वास लिइएको छ ।
“सबल बैंक, सफल सहकार्य” को नारालाई आत्मसाथ गर्दै नेपाली जनताको घरदैलोमा विगत २९ वर्ष देखि अनवरत रुपले गुणस्तरीय वित्तीय सेवा प्रदान गर्दै आएको यस बैंकले आगामी दिनहरुमा पनि सामाजिक उत्तरदायित्व कार्यक्रम अन्तर्गत सामाजिक, आर्थिक रुपान्तरणका लागि विभिन्न कार्यक्रमहरु निरन्तर रुपमा सञ्चालन गर्ने कुरा जनाएको छ ।
प्रकाशित मिति: आइतबार, वैशाख १६, २०८१ १८:०२
