भैरहवा, रुपन्देही । सोमबार एकाविहानै भैरहवामा रहेको गौतमबुद्ध अन्र्तराष्ट्रिय विमानस्थलतर्फ आगोको ठूलो मूस्लो देखियो।
त्यहाँ विमान दुर्घटना भएको भैरहवावासीको अड्कल थियो । लगत्तै दमकल र एम्बुलेन्स लगायतको साईरन घन्किन थाले पछि भैरहवावासीले गरेको दुर्घटनाको अड्कललाई थप बल पुग्यो । आगोको मूस्लो बिमान दुर्घटनाकै थियो ।
गौतमबुद्ध अन्र्तराष्ट्रिय विमानस्थलबाट कुवेतको लागि उडेको शिवम एयरलाईन्सको ए ३२० प्रकारको फ्लाईट नम्बर शिवम ३४६ विमानको ईन्जिनमा एक्कासी चरा ठोक्किदा विमानलाई भैरहवा विमानस्थलमै आकस्मिक अवतरण गराउने प्रयास गरिएको थियो।
आकस्मिक अवतरणको क्रममा विमान दुर्घटनामा परेको हो । जहाजको बाँया ईन्जिनमा समस्या देखिएपछि बिमानलाई आकस्मिक अवतरण गराउनु परेको गौतमबुद्ध अन्र्तराष्ट्रिय विमानस्थलको भनाई छ ।
विमानमा सवार चालकदलका सहित १सय ६ यात्रु थिए । जसमध्ये २५ जनाको मृत्यु भएको गौतमबुद्ध अन्र्तराष्ट्रिय विमानस्थलका प्रवक्ता दिपककुमार बज्राचार्यले बताए। दुर्घटनामा परि अन्य ८१ जना घाईते भएका छन् ।
विमानस्थलमा अवतरण हुँदै गरेको शिवम एयरको विमानमा आगलागी भए पछि विमानस्थमा रहेको उद्दार तथा अग्नी निवारण शाखाबाट खटिएको उद्दारकर्मी र नेपाली सेना तथा नेपाल प्रहरीबाट विमानको आगो निभाई सफल रुपमा घाईतेहरुको उद्दार गरिएको थियो।
भैरहवा विमानस्थल पुग्दा सूचना अधिकारी दिपक बज्राचार्यले जानकारी गराई रहेको थियो । यी सबै दृश्य वास्तविक थिए तर दुर्घटना वास्तविक थिएन ।
गौतमबुद्ध अन्र्तराष्ट्रिय विमानस्थल क्षेत्रभित्र हुने जहाज दुर्घटना पश्चात उद्धारलाई व्यवस्थित र छिटो छरीतो बनाउन विमानस्थलमा पूर्णकालीन आपतकालीन उद्धार अभ्यास गरिएको दृश्य थियो यो ।
अन्तर्राष्ट्रिय नागरिक उड्डयन संगठनको मापदण्ड अनुसार विमानस्थलमा फायर फाइटर, नेपाली सेना, सशस्त्र प्रहरी र जनपथ प्रहरीका उद्धार टोली, एम्बुलेन्स तथा दमकल समेतको सहभागितामा फुल स्केलको आपतकालिन अभ्यास गरिएको हो।
अन्तराष्ट्रिय विमानस्थलमा यस्ता अभ्यास गर्नुपर्ने मापदण्ड रहेको छ । सोही अनुसार गौतमबुद्ध अन्र्तराष्ट्रिय विमानस्थलमा वृहत अभ्यास सहित दोश्रो पटक अभ्यास गरिएको हो ।
व्यवहारिक अभ्यास र आपतकालिन अवस्थामा अपनाउनु पर्ने कामबारे प्राविधिकलाई जानकारी दिईएको छ । गौतमबुद्ध अन्तराष्ट्रिय विमानस्थल नेपालको आन्तरिकतर्फ सबै मौसममा व्यस्त हुने विमानस्थल पनि हो ।
जहाज दुर्घटना भएको अवस्थामा विमानस्थल संचालन र आपतकालीन उद्धारमा सरोकारवालाहरुको सक्रियतालाई व्यवहारिक रुपमै अभ्यास गर्न यस्तो अभ्यास गरिएको विमानस्थलका महाप्रवन्धक अजितबाबु तिवारीले बताए ।
अन्तर्राष्ट्रिय नागरिक उड्डयन संगठनको मापदण्डभित्र रहेर सोमबार विहान ९ बजेदेखि साढे ९ बजेको बीचमा फायर फाइटर, सेना, सशस्त्रप्रहरी र जनपथ प्रहरीका उद्धार टोली विमानस्थलमा एम्बुलेन्स तथा दमकल समेत तयारी अवस्थामा राखी फुल स्केलको आपतकालिन अभ्यास गरिएको विमानस्थल प्रमुख तिवारीले जानकारी दिए ।
यसले भोलिका दिनमा जहाज वास्तविक रुपमा दुर्घटना हुँदा नआत्तिकन मनोबल बढाउदै उद्दारमा सहज हुने उनको बुझाई छ। कुनै पनि दुर्घटना भए हामी त्यसको सामान तयार गर्न र आत्मबल बढेको सन्देश दिन यो अभ्यास गरेको तिवारीले भने ।
