म्याग्दी, बेनी । बेनी नगरपालिका-३ भकिम्लीका धनबहादुर श्रीषले रहरमा सुरु गरेको बाख्रापालन व्यावसायिक बनेपछि अगुवा कृषकको पहिचान बनाएको छ ।
तेह्र वर्षअघि खाडी मुलुकको वैदेशिक रोजगारलाई बिट मारेर श्रीषले स्थानीय जातका बाख्रापालन सूरु गरेको हो।
जीविकोपार्जन र स्वरोजगार बन्ने उदेश्यले सानो लगानीमा सुरु गरेको बाख्रापालनलाई व्यावसायिक बनाएका श्रीषले अहिले उन्नत जातका बोयर बाख्राको स्रोत केन्द्र स्थापना गरेको छ ।
कृषक श्रीषले सञ्चालन गरेको श्रीष पशुपालन तथा बहुउदेश्यीय कृषि फार्ममा विगत ५ बर्षदेखि शुद्ध बोयर जातका बाख्रापालन हुँदै आएको छ। श्रीषले बोयर बाख्रा भने ९ बर्षदेखि पालन गर्न सुरु गरेको थियो । श्रीषको फार्मलाई राष्ट्रिय पशु प्रजनन कार्यालय पोखराले बाह्य स्रोत केन्द्को रुपमा समावेश गरेको छ ।
लामो समयसम्म मासु उपभोगका लागि बाख्रापालन गरेको र पछिल्लो समय फार्मलाई बिउका लागि शुद्ध बोयर बाख्र्रा उत्पादन केन्द्रको रुपमा विकास गरेको फार्मका सञ्चालक श्रीषले बताए ।
श्रीषको फार्ममा अहिले ४५ वटा शुद्ध बोयर बाख्रा छन् । फार्ममा ३ वटा ब्याडे बोका छन् । फार्ममा रहेका २० वटा माउ बाख्राले पाठापाठी जन्माउँछन्।फार्मबाट बार्षिक रुपमा ५० वटा शुद्ध बोयर बाख्रा र बोका बिउको लागी विक्रि हुँदै आएको श्रीषले बताए। यहाँबाट देशका विभिन्न ५५ जिल्लामा बिउको रुपमा बाख्रा लगिएको छ ।
बार्षिक रुपमा १७ लाख बराबरको बोयर बाख्रा विक्रि गर्दै आएका श्रीषले व्यवस्थित र व्यावसायिक रुपमा स्थापना गरेको यो बाख्रा फार्ममा देशका विभिन्न ठाउँबाट नयाँ किसानहरु अध्ययन अवलोकनका लागि समेत आउने गर्छन।
बाख्रापालनको लागि श्रीषले ६० रोपनी जग्गामा घाँसका विरुवा रोपेको छ । केहि बर्ष अघिसम्म बार्षिक रुपमा १ करोड बढीको बोयर विक्रि गरेका श्रीषले पछिल्लो समय स्वदेशमा युवाहरुको अभाव र विदेश पलायन हुने क्रमले बाख्रापालनतर्फ आकर्षण घटेको कारण आफले फार्ममा बोयर बाख्राको संख्या बढाउन समस्या भएको बताए ।
बाख्रापालनमा लगानी, मेहनत, परिश्रम र आम्दानी सबैको चाँजो मिल्नुपर्ने बताउने कृषक श्रीषले बाख्रापालनबाटै घरखर्च धानेको र पो पेशाबाट आफु सन्तुष्ट रहेको बताए ।
श्रीषले बाख्रा फार्ममा खोर बनाउन मात्रै ५० लाख बढी लगानी गरेको छ । आफूले बाख्रापालन गरेपछि धेरै जना यो पेशामा जोडिन आउने र जाने क्रम भएपनि आफू भने आफ्नै घरमा आफ्नै पौरखमा रमाउन बाख्रापालनलाई व्यवस्थित र व्यावसायिक बनाएर बसेको उनको भनाई छ ।
राज्यले पशुपालन क्षेत्रलाई प्राथमिकतामा राखेर अनुदान लगायतमा धेरथोर सहयोग गरेपनि पछिल्लो समय कृषि सहुलियत ऋण पाउन मुस्कील पर्ने र बिमा बापतको रकम भुक्तानीमा ढिलासुुस्ती हुँदा आफूहरु समस्यामा परेको कृषक श्रीषले गुनासो गरे।
प्रकाशित मिति: बिहीबार, असार ७, २०८१ १९:३०
