मुस्ताङ । मुस्ताङको घरपझोङ गाउँपालिका-५ ठिनीमा परम्परागत रुपमा मनाइने फालो (भदौरे मेला) प्रभावित भएको छ।
रोजगारी, शिक्षा र अवसरको खोजीमा युवाहरु विदेश र सहर पसेपछि हरेक वर्ष भदौको मध्यमा तीन दिन मनाइने भदौरे मेला प्रभावित बनेको हो।
भदौरे मेला ठिनीबासीको प्रमुख पर्व हो । ठिनीको भदौरे मेलाका संयोजक सवी थकालीले युवा जनशक्ति नभएपछि तीन दिन मनाउने भदौरे मेला पछिल्लो केही वर्षयता दुई दिन मात्र सञ्चालन गर्नुपरेको भदौरे मेला संयोजक सबी थकालीले बताए ।
मेलामा देखाउने नृत्यका लागि कलाकार जनशक्तिको कमी र गाउँमा भएकाहरुले पनि कार्यब्यस्तताले समय दिन नसकेपछि मेलाको समय अवधि छोटाइएको छ । विद्यालय पढ्ने उमेर समुहका किशोर किशोरी र जेष्ठ नागरिकहरुको भरमा भदौले मेलाको याक, झाँक्री, थकोर्चेन, योद्धा, ढोङग्री लगायतका नाँचलाई निरन्तरता दिइएको छ ।
पहिले युवाहरु मात्र सहभागी हुने नाँचमा पछिल्लो समय पाकाका साथै किशोरावस्थाका कलाकारहरु धेरै हुुन्छन्। खेतीबाली लगाएर सकिएपछि फुर्सदिला भएका गाउँलेहरुलाई मनोरञ्जन र हिउँद शुरु भएको सन्देश दिन भदौरे पर्व मनाउने चलन रहेको छ।
तल्लो मुस्ताङका थकाली समुदायको बसोबास रहेका बस्तीमा जनै पूर्णिमा पर्व पछि फरक फरक तिथिमा फालो मनाउने गर्छन्। भदौरे मेलामा थकाली संस्कृतिमा आधारित मौलिक नृत्यका साथै समाज र देशमा भइरहेका विकृती, विसंगतीहरुलाई ब्यङग्य मार्फत खबरदारी गर्ने चलन रहेको ठिनीको जनमुुक्ति युवा क्लवका सचिव निरज थकालीले बताए ।
लामाहरुबाट गुम्बामा देवीदेवताको पुजाआजाका साथै संस्कार, संस्कृति, प्रकृति, वातावरण संरक्षणसँग सम्बन्धित सन्देशमुलक नाटकहरु पनि प्रर्दशन हुुन्छ । भदौरे मेला र मौलिक नाँचहरुलाई लोप हुन नदिन पाका पुस्ताका कलाकारहरुबाट किशोर किशोरीहरुमा नृत्य कला र सीप हस्तान्तरण गराउन पहल भएको छ ।
भदौरे मेला अवलोकनका लागि ठिनीमा देशका विभिन्न ठाउँका साथै विदेशी पर्यटकहरु पनि आउँछन्।
प्रकाशित मिति: मंगलबार, भदौ १८, २०८१ २३:०५
