ढोरपाटन, बागलुङ । दूरको गाउँ । चारै तिर हरियाली पहाड । उत्तरगंगा नदीको आठमै छ, निसेलढोर गाउँ। गाउँको वरपर कतै समथर त कतै भीरालो जमिन टक्क अडिएको छ ।
परम्परागत शैलीमा बनेका काठैकाठको घर । नजिकै आलुबारी । स्याउका बगैचा । खाम भाषा, फरक रीतिरिवाज र परम्परा। हेर्दा त आकर्षक देखिन्छ निसेलढोर । तर, बस्तीको पीडा भने निकै जटिल रहेको छ ।
जति सुन्दरता प्रकृतिले दिएको छ उति नै सास्ती विकटताले । निसेलढोरका नागरिकको समस्या र सास्तीको कथा दर्दनाक छ। पुग्नेले पनि अड्कलबाजी काट्नै सक्दैनन् । सदरमुकाम बागलुङ बजारदेखि दूरमा रहेको निसेलढोर नेपालको एक मात्र सिकार आरक्ष ढोरपाटनमा पर्छ। विकासका हिसाबले पछाडि परेको भूगोल पर्यटकीय सम्भावनाले अब्बल छ ।
अनेकन समस्याका बाबजुद पनि निसेलढोरबासी यहीं बस्तीमा रमाइरहेका छन् । निसीखोला गाउँपालिका-५ मा पर्ने निसेलढोरमा अधिकांश निसी गाउँबाटै गएर बस्छन्् । निसेलढोर लेकमा र निसी गाउँ बेसीमा पर्छ । यहाँका स्थानीयको कथा व्यथा एउटै छ।
परम्परागत खेतीपाती र पशुपालन गर्दै आएका स्थानीय भौतिक पूर्वाधारको विकास र अवसरको पर्खाइमा छन्। ढोरपाटन नगरपालिकाको केन्द्र बुर्तिबाङ बजारदेखि उत्तरगंगा ढोरपाटन हुँदै निसेलढोर सडकले जोडिए पनि हालसम्म निसीखोलाबाट सिधै सडक सञ्जालले जोडिन सकेको छैन।
निसीखोला र निसेलढोरको बिचमा रहेका भीमकाय पहाड सडक सञ्जालले जोड्न तगारो बनेको हो। अहिलेसम्म विद्युतको पहुँच पुगेको छैन।
दियालो र टुकीकै भरमा अध्याँरोलाई जित्नुपर्छ । शिक्षा, स्वास्थ्य, खानेपानी जस्ता आधारभूत विकासको उपभोग निसेलढोरबासीले पाएका छैनन्।
निसेलढोरलाई प्रकृतिले त अनेकन चिज दिएको छ । तीन तहका सरकारले विकासे उपहार कहिले दिने हुन् कुनै अत्तो पत्तो छैन। निर्वाचनताका नेता सुनाउने जीवनस्तर परिवर्तन र उत्कृष्ट पर्यटकीय गन्तव्यका वाचा सत्तामा पुग्नेहरुले भुलेका छन्।
त्यसैले त निसेलढोरका जनतालाई चहर्याइरहेको घाउमा अभावको खत बस्न सकेको छैन ।
प्रकाशित मिति: सोमबार, भदौ ३१, २०८१ २०:२०
-1777773700.jpg)
