ढोरपाटन,बागलुङ । राष्ट्रिय गौरवको आयोजना मध्यपहाडी लोकमार्ग बाढी र पहिरोका कारण जोखिमपूर्ण बनेको छ ।
मालढुङ्गादेखि पातीहाल्नेसम्म करिब १४२ किलोमिटर बागलुङ खण्डमा पर्ने लोकमार्गको धेरै ठाउँमा भासिने र सडकको बिच बिचमा ठूलो-ठूलो खाल्डाखुल्डी पर्दा यात्रा गर्न जोखिम भएको हो ।
लोकमार्ग अन्तर्गत बागलुङ बजारदेखि घोडाबाँधे, गलकोट, खर्बाङ, बुर्तिबाङ र निसीखोला खण्डको दर्जनौँ स्थानमा पहिरोले सडक साँघुरो बनाउनुका साथै कालोपत्रे उप्किएको छ ।
उपल्लाचौरदेखि घोडाबाँधेसम्मको करिब १५ किलोमिटर बाहेक अरु खण्डमा कालोपत्रे भइसके पनि ठाउँठाउँमा उप्किदा यात्रा गर्न निकै कठिन हुने गरेको छ ।
मध्यपहाडी लोकमार्ग कार्यालय पर्वतका सूचना अधिकारी धिरज ढकालले लोकमार्गको बागलुङ खण्ड अन्तर्गत गलकोट, बडिगाड र निसीखोलामा बढी क्षति भएको बताए ।
तत्काल सडक सुचारु गर्नका लागि मेसिन प्रयोग खुलाउने काम भइरहेको भन्दै धेरै क्षति भएको ठाउँमा ठेक्का प्रक्रियाबाट काम गरिने उनको भनाइ छ ।
साँघुरो र खाल्डाखुल्डी सडकका कारण जोखिम मोलेर यात्रा गर्न बाध्य भएको गाडी चालक पूर्णबहादुर सुनारले बताए। कालोपत्र सडकको बीच भागमा ठूला-ठूला टायर फस्ने गाल्डाखुल्डी परेको हुँदा गाडीको पट्टा भाँचिने र अरु मेसिनरी सामग्रीहरु बिग्रिने गरेको उनको भनाइ छ ।
महिनौँ अगाडि बिग्रिएको लोकमार्ग लामो समयसम्म पनि मर्मत नहुँदा यात्रु र यातायात व्यवसायी मारमा परेको सुनारले बताए। सडक छेउका नालीसमेत वर्षौँदेखि मर्मत नहुँदा भल सडकमै बग्ने हुँदा कालोपत्र धेरै समय नटिक्ने गरेको उनको भनाइ छ।
प्रकाशित मिति: मंगलबार, असोज ८, २०८१ १७:१०
-1777773700.jpg)
