त्रिशूली, नुवाकोट । प्रहरी महानिरीक्षक बसन्तबहादुर कुँवरले समाजमा अशान्ति सिर्जना गर्न खोज्ने विरुद्ध कडा रुपमा प्रस्तुत हुन मातहतको प्रहरी कर्मचारीलाई निर्देशन दिएको छ ।
जिल्ला प्रहरी कार्यालय नुवाकोटको परिसरमा निर्माण गरिएको भगवती मन्दिर र नागरिक सहायता कक्ष भवनको शनिबार उद्घाटन गर्दै महानिरीक्षक कुँवरले समाजमा अशान्ति र अराजकता फैलाउने आपराधिक समूहका क्रियाकलाप नियन्त्रण गर्दै नागरिकको स्वतन्त्रता सुनिश्चित हुने कर्तव्य पूरागर्न प्रहरी कर्मचारीको ध्यानाकर्षण गराएको हो ।
“समाजमा गैरकानूनी र अनैतिक कार्य गर्ने व्यक्ति तथा समूह एवम् सामाजिक सञ्जालको दुरूपयोग गर्ने व्यक्तिहरु विरूद्ध खरो रूपमा प्रस्तुत हुन प्रहरी सदैव तयारी अबस्थामा बस्नुपर्छ ।” उनले भने, “कुनै किसिमको दवाव र प्रभावमा नपरी उत्कृष्ट कार्यसम्पादन गर्न कटिबद्ध भएर आफ्नो शाख जोगाउन लाग्नुहोस् ।”
सीमित श्रोत साधनबाट नै प्रहरीले आफ्नो शतप्रतिशत योगदान दिने प्रयास हरदम जारी राखेकाले अभाव, दबाब र प्रभावमा नपर्ननको लागि प्रहरी कर्मचारीलाई महानिरीक्षक कुँवरले सचेत गराए ।
प्रत्याशित वा अप्रत्याशित रूपमा आएका वा आउन सक्ने विपदजन्य घटना सबैको चुनौतिको रूपमा रहेको हुँदा त्यसको सामनाको लागि सुरक्षा निकायको सुदृढ तयारीका साथै सरोकारवाला निकायबीचको सामूहिक प्रयास, ऐक्यबद्धता र प्रभावकारी समन्वय अपरिहार्य आवश्यक रहेको उनले बताए ।
आसन्न स्थानीय तहको उप–निर्वाचन स्वतन्त्र, निष्पक्ष र भयरहित वातावरणमा सम्पन्न गराउन सुरक्षा चुनौति तथा जोखिमको विश्लेषण गरी ‘निर्वाचन सुरक्षा योजना’ निर्माण गर्न तथा कार्यान्वयनको निमित्त तयारी अवस्थामा रहन महानिरीक्षक कुँवरले मातहतको प्रहरी कर्मचारीलाई निर्देशन दिए ।
प्रकाशित मिति: आइतबार, मंसिर ९, २०८१ १९:१६
