ढोरपाटन, बागलुङ । म्याग्दीको बेनी नगरपालिका-४ सिंगा तातोपानी कुण्डमा स्नान गर्नेको घुइँचो लागेको छ।
प्राकृतिक चिकित्सालयका रुपमा चिनिने तातोपानी कुण्डमा नुहाउँदा विभिन्न रोगको निको हुने हुँदा देशभरबाट स्नान गर्न आउनेको घुइँचो लागेको हो ।
वर्षातको समयबाहेक अरु बेला तातोपानी कुण्डमा स्नानका लागि विदेशी पर्यटक पनि आउने गरेको छन्। बागलुङको प्रसिद्ध धार्मिकस्थल बागलुङ कालिका, पञ्चकोट, शालग्राम संग्रहालय, म्याग्दीको गलेश्वर र मुस्ताङको मुक्तिनाथ पुग्ने पर्यटकसमेत अहिले तातोपानी कुण्डमा पुगेर नुहाउने गरेका छन् ।
बाह्रै महिना स्नानका लागि तातोपानी कुण्ड खुला गरे पनि असारदेखि असोजसम्म निकै कम मात्रै मानिसहरु आउने गर्छन्। असोज लागेपछि अहिले दैनिक ४ सयभन्दा बढी स्नान गर्ने बिरामीहरु आउने तातोपानी कुण्ड व्यवस्थापन समितिका अध्यक्ष कृष्ण खड्काले बताए छ ।
तातोपानी कुण्डमा खास गरि बिरामीहरु बढी आउने गर्छन् । बिरे नुनको गन्ध आउने पानी संकलन गरिएको पोखरीमा स्नान गरेर छाला, ग्यास्ट्रिक, बाथ, चोटपटक लागेको, सड्के मड्के लगायतका स्वास्थ्य समस्या निको हुने बागलुङका गोपाल हर्मेल र सालझण्डीका हिरादेवी रेग्मीले बताए ।
स्नानका लागि आएका बिरामीले तातोपानी बजारमा चहलपहल उत्तिकै छ । म्याग्दी नदीको किनारमा जमिनभित्रबाट बिरेनुनको गन्धमा निस्कने ५० डिग्री सेल्सियस तातोपानी जम्मा गरेर तलाउमा एकपटकमा ३ सय ५० देखि ४ सयले स्नान गर्न सक्ने क्षमता छ। छोटो समयका लागि स्नान गर्नेलाई छुट्टै पोखरी बनाइएको छ ।
प्रकाशित मिति: शुक्रबार, मंसिर १४, २०८१ १७:०२
