उदयपुर । उदयपुरको बेलका नगरपालिका ८ मैनामैनीस्थित बोक्ताङमा मोटरसाईकल दुर्घटना हुँदा चालकको निधन भएको छ भने पछाडि सवार किशोरी घाईते भएकी छिन् ।
अहिले चर्चित भईरहेको बोक्ताङ गएर फर्कने क्रममा मङ्गलबार राति पौने ७ः०० बजे को ३८ प ९८७ नं. को मोटरसाइकल दुर्घट्ना हुँदा चालक मोरङको टङ्किसिनवारी गाउँपालिका २ का ३२ वर्षीय अनिल राजवंशीको निधन भएको हो ।
जिल्ला प्रहरी कार्यालय उदयपुरका अनुसार बोक्ताङबाट फर्कदै गरेको मोटरसाईकल ओरालो कच्ची सडकको घुम्तीमा अनियन्त्रित भई सडकदेखि २५ मिटर तल खसेर दुर्घटनामा परेको छ । दुर्घटनामा परेका चालक राजवंशी रुखमा अड्कििएको अवस्थामा स्थानीयले फेला पारेर प्रहरीलाई खवर गरेका थिए ।
कोठुस्थित अस्थायी प्रहरी चौकीबाट खटेको टोलीको सहयोगमा उद्धार गरी उपचारार्थ बिराटनगरस्थित बिराट शिक्षण अस्पताल पठाइएका राजवंशीको गएराति नै निधन भएको जिल्ला प्रहरी कार्यालयका सूचना अधिकारी डिएसपी केदारमान दोङले बताए । उनका अनुसार घाईते भएकी पछाडि सवार भोजपुर षडानन्द नगरपालिका ७ की १८ वर्षीया तुलसा कार्कीको उपचार भईरहेको छ । उनी मोटरसाइकल अनियन्त्रित हुँदै गएको थाहा पाएपछि हाम फालेर बँचेको बताइएको छ ।
प्रकाशित मिति: बिहीबार, असार २६, २०८२ ०८:४९
