काठमाडौं। कुनैबेला नेपालको नाना पाटेकर भनेर चिनिएका कलाकार श्याम सुन्दर श्रेष्ठ सिकिस्त विरामी परेका छन्। विगत एक महिनादेखि बेहोशी अवस्थामा फाजु बाबा समेत भनेर चिनिएका कलाकार श्रेष्ठको काठमाडौंको बबरमहलस्थित अन्नपूर्ण न्यूरो अस्पतालमा उपचार भैरहेको छ।
डाक्टरहरुका अनुसार, कलाकार श्रेष्ठको टाउकोमा दूर्घटनाको गंभीर चोट रहेको छ। सोही चोटका कारण टाउकोको शल्यक्रिया समेत गरिसकेको छ। डाक्टरहरुको अथक प्रयासका वावजुद पनि कलाकार श्रेष्ठको होश आउन सकेको छैन्।
विसं.२०७८ साल जेष्ठ २८ गते काठमाडौंको ताहाचलस्थित चारदोबाटोमा राति ११ः३० बजे भएको गंभीर दूर्घटनामा कलाकार श्रेष्ठ परेका थिए। श्रेष्ठ सवार मोटरसाइकललाई विपरित दिशावाट हुइँकिएर आएको विरामी नबोकेको एम्बुलेन्सले ठक्कर दिएर फरार भएको थियो।
उक्त गंभीर दूर्घटनामा परेका श्रेष्ठको उपचार प्रहरीको सहयोगले काठमाडौंको सीतापाइला स्थित मनमोहन अस्पताल हुदै बाँसबारीको न्यूरो अस्पतालमा गरिएको थियो। बाँसबारीको न्यूरो अस्पतालमा ६ महिना लामो उपचार पश्चात होशमा आएका कलाकार श्रेष्ठको उपचारमा करोडौ खर्च भैसकेको छ।
दूर्घटनाको चार बर्ष वितिसक्दा पनि दूर्घटना गराउने एम्बुलेन्स र उक्त एम्बुलेन्स चालकलाई प्रहरीले पत्ता लगाउन सकेको छैन्। पटक पटकको टाउको शल्यक्रिया तथा महंगो औषधि उपचारले केही सामान्य अवस्थामा आएपनि टाउकोमा सानो कुनै चोट पर्नासाथ पटक पटक उक्त समस्या आउने गरेको कलाकार श्रेष्ठकी पत्नी दिना मानन्धरले बताएकी छन्। महिना दिनअघि पनि शौचालय जाने क्रममा लडेर टाउकोमा चोट परेपछि बेहोश बनेको र हालसम्म पनि होश नआएको उनको भनाई छ।
विगत चार बर्षदेखि यसरी नै पटक पटक उपचारमा लाग्दालाग्दै आर्थिक अवस्थाले थेग्न नै नसकेको र अस्पतालको शुल्क तिर्न पनि कठिनाइ भैसकेको उनले तितो यथार्थ पोखेकी छन्। कठिन अवस्था तथा चरम आर्थिक समस्याले गर्दा विरामी पतिलाई बचाइदिन पत्नी दिना मानन्धरले सवै शुभचिन्तकहरुलाई आग्रह तथा अनुरोध गरेकी छन्।
नेपाली चलचित्र जंगली–बाबु लगायतका चलचित्र तथा म्युजिक भिडियोका अभिनेता रहेका कलाकार श्रेष्ठ गंभीर दूर्घटनामा पर्नुअघिसम्म सामाजिक क्षेत्रमा अत्यन्त सक्रिय थिए। सामाजिक संस्था श्रीशक्ति समूह मार्फत मर्कामा परेकाहरुलाई सहयोग गर्दैआएका कलाकार श्रेष्ठ गम्भिर अवस्थामा छन्।
उनको जीवन रक्षाको लागि आर्थिक सहयोगको अपिल गरिएको छ। शुभचिन्तकहरुले उनको बेहोश अवस्थामा उपचार भैरहेको बबरमहल स्थित अन्नपूर्ण न्यूरो अस्पतालमा प्रत्यक्ष भेटेर सहयोग गर्न सकिन्छ। अस्पताल पुग्न नसक्ने सहयोगदाताहरुले निम्न बैंकको क्यूआर कोड मार्फत सहयोग गर्न सकिने भनिएको छ।
प्रकाशित मिति: शनिबार, साउन ४, २०८२ २२:४२
