उदयपुर । उदयपुरको कटारी बजार क्षेत्रमा एक सातादेखि खानेपानी आपूर्ति ठप्प भएपछि आक्रोशित स्थानीयवासीले रित्तो गाग्री बोकेर नगर प्रमुखको घर घेराउ गरेका छन्। खानेपानी संकट चर्किएपछि स्थानीयको दबाबमा कटारी नगरपालिकाले आइतबार दमकलमार्फत पानी वितरण गरेको छ।
कटारी नगरपालिका–४ डाँडाटोलका स्थानीयवासीहरू आइतबार बिहान रित्ता गाग्रीसहित कटारी नगरपालिकाका नगर प्रमुख राजेशचन्द्र श्रेष्ठको निवास पुगेका थिए। लामो समयदेखि धारामा पानी नआएको र दैनिक जीवन नै प्रभावित बनेको भन्दै उनीहरूले तत्काल वैकल्पिक व्यवस्था गर्न माग गरेका थिए।
कटारी नयाँ खानेपानी तथा उपभोक्ता संस्थाद्वारा सञ्चालित खानेपानी आयोजनाको मुख्य मोटर बिग्रिएपछि कटारी बजारसहित आसपासका बस्तीमा पानी आपूर्ति बन्द भएको हो। पानी अभावका कारण घरधन्दा, सरसफाइ तथा अन्य दैनिक कामकाजमा समस्या भएको स्थानीयहरूको गुनासो छ।
स्थानीय केदार रानामगरले डाँडाटोल क्षेत्रमा इनार वा अन्य वैकल्पिक पानी स्रोतसमेत नभएकाले समस्या झनै गम्भीर बनेको बताए। उनका अनुसार पानीको अभावले शौच, नुहाउने, लुगा धुनेदेखि भान्साका सामान्य कामसमेत प्रभावित भएका छन्।
स्थानीय युवा अस्मित पौडेलले लामो समयसम्म समस्या समाधानका लागि कुनै प्रभावकारी पहल नभएको महसुस भएपछि बाध्य भएर स्थानीयवासीहरू रित्तो गाग्री बोकेर नगर प्रमुखको घरसम्म पुगेको बताए।
स्थानीयको विरोधपछि नगर प्रमुख श्रेष्ठले खानेपानी समस्या समाधानका लागि आवश्यक पहल भइरहेको जानकारी दिएका छन्। उनका अनुसार बिग्रिएको मोटर मर्मत तथा नयाँ मोटर जडानको प्रक्रिया अन्तिम चरणमा पुगेको छ। तत्कालका लागि नगरपालिकाले दमकलमार्फत प्रभावित क्षेत्रमा पानी वितरणको व्यवस्था मिलाएको उनले बताए।
“एक–दुई दिनभित्रै खानेपानी सेवा पुनः सञ्चालन गर्ने लक्ष्यका साथ काम भइरहेको छ। यदि तत्काल सञ्चालन हुन नसके नगरपालिकाको स्रोत प्रयोग गरेर वैकल्पिक रूपमा पानी उपलब्ध गराइनेछ,” नगर प्रमुख श्रेष्ठले भने।
खानेपानी अभावबाट कटारी नगरपालिका–३, ४ र ५ का अधिकांश बासिन्दा प्रभावित भएका छन्। बजार क्षेत्रका घरपरिवार मात्र होइन, होटल, रेस्टुरेन्ट, पसल तथा अन्य व्यवसायिक प्रतिष्ठानहरू पनि समस्यामा परेका छन्। धाराको पानी बन्द भएपछि कतिपयले खोलाबाट अटो–रिक्सामार्फत पानी ल्याएर दैनिक आवश्यकता पूरा गर्न थालेका छन्।
बजार क्षेत्रमा पानीको माग बढ्दै जाँदा निजी रूपमा पानी खरिद गर्न नसक्ने सर्वसाधारण सबैभन्दा बढी प्रभावित बनेका छन्। नगर प्रमुख श्रेष्ठका अनुसार नगरपालिकाले खरिद गरेको नयाँ मोटर भन्सार प्रक्रियामा रहेकाले समस्या समाधानमा केही ढिलाइ भएको हो। यद्यपि, मोटर जडानको काम तीव्र रूपमा अघि बढाइएको र छिट्टै नियमित आपूर्ति सुरु गरिने उनले बताए।
कटारी नयाँ खानेपानी तथा उपभोक्ता संस्थाका अध्यक्ष विष्णु पौडेलले आयोजनाको मुख्य मोटरमा प्राविधिक खराबी आएपछि पानी वितरण अवरुद्ध भएको जानकारी दिए। नयाँ मोटर जडानको प्रक्रिया जारी रहेकाले केही दिनभित्रै समस्या समाधान हुने उनको भनाइ छ।
खानेपानी जस्तो आधारभूत सेवामा आएको अवरोधका कारण स्थानीयवासीले प्रत्यक्ष रूपमा जनप्रतिनिधिको ध्यानाकर्षण गराएको यो घटना कटारीमा बढ्दो खानेपानी संकटको संकेतका रूपमा समेत हेरिएको छ। स्थानीयवासीले दीर्घकालीन समाधानको माग गर्दै यस्ता समस्या दोहोरिन नदिन स्थायी र भरपर्दो खानेपानी व्यवस्थापन गर्न नगरपालिकासँग आग्रह गरेका छन्।
