विराटनगर । ‘डिजिटल नागरिक क्षेत्र सुदृढीकरणका लागि युवाहरूको साझा सहभागिता’ भन्ने मूल नारासहित कोशी प्रदेश युवा सम्मेलन–२०२६ आजदेखि विराटनगरमा औपचारिक रूपमा सुरु भएको छ । दुई दिनसम्म सञ्चालन हुने सम्मेलनमा कोशी प्रदेशका १४ वटै जिल्लाबाट आएका युवा सामाजिक अभियन्ता, नीति निर्माता तथा विभिन्न क्षेत्रका सरोकारवालाहरूको उत्साहजनक सहभागिता छ ।
सम्मेलनको उद्घाटन कोशी प्रदेश सरकारका सामाजिक विकास मन्त्री रामप्रसाद महतोको प्रमुख आतिथ्यतामा सम्पन्न भएको हो । कार्यक्रममा कोशी प्रदेश सरकारका भौतिक पूर्वाधार विकास राज्यमन्त्री शोभा पालुङ्गवा चेम्जोङ, प्रदेश योजना आयोगका उपाध्यक्ष तारानाथ निरौला, गैरसरकारी संस्था महासंघ नेपालका केन्द्रीय उपमहासचिव किरण थापा तथा युवा अभियानका महासचिव सुस्मिता यादवलगायतको विशेष उपस्थिति रहेको थियो ।
युवाहरूलाई डिजिटल साक्षरता, नागरिक सहभागिता, नेतृत्व विकास, नवप्रवर्तन तथा डिजिटल नागरिक क्षेत्रको सुदृढीकरणका विषयमा सशक्त बनाउने उद्देश्यका साथ सम्मेलन आयोजना गरिएको आयोजकले जनाएको छ ।
सम्मेलनले युवाहरूलाई आफ्ना अनुभव आदान–प्रदान गर्ने, नवीन सोच प्रस्तुत गर्ने तथा डिजिटल युगका अवसर र चुनौतीबारे गहन छलफल गर्ने साझा मञ्च प्रदान गर्ने अपेक्षा गरिएको छ ।
गैरसरकारी संस्था महासंघ नेपाल, युवा अभियान नेपाल र सिभिकसको सहकार्य तथा युरोपियन युनियनको आर्थिक सहयोगमा आयोजित सम्मेलनले युवाहरूको क्षमता विकास, नेटवर्क विस्तार र नीतिगत संवादलाई थप प्रभावकारी बनाउने विश्वास लिइएको छ ।
उद्घाटन समारोहलाई सम्बोधन गर्दै सामाजिक विकास मन्त्री रामप्रसाद महतोले राष्ट्र निर्माण, सुशासन प्रवद्र्धन र डिजिटल रूपान्तरणका प्रक्रियामा युवाको सक्रिय सहभागिता अपरिहार्य रहेको बताएका थिए । उनले युवाहरूलाई सिर्जनशील, जिम्मेवार र नेतृत्वदायी भूमिकामा अघि बढ्न प्रेरित गर्दै डिजिटल युगका अवसरहरूको अधिकतम उपयोग गर्न आग्रह गरेका थिए ।
दुई दिनसम्म सञ्चालन हुने सम्मेलनमा विषयगत प्रस्तुति, अन्तरक्रिया, समूह छलफल तथा अनुभव आदान–प्रदानका विविध कार्यक्रम समावेश गरिएका छन् । युवाको नेतृत्व, डिजिटल अधिकार, नागरिक सहभागिता तथा सामाजिक रूपान्तरणका क्षेत्रमा नयाँ सम्भावना र नवीन सोचको खोजी गर्दै सम्मेलनले डिजिटल नागरिक क्षेत्रलाई थप सशक्त बनाउने अपेक्षा गरिएको आयोजकले जनाएको छ ।
प्रकाशित मिति: शुक्रबार, जेठ २९, २०८३ १५:५५
