मिलन काफ्ले
पाल्पा । पाल्पाको रम्भा गाउँपालिकाको बहुप्रतीक्षित प्रशासकीय भवन निर्माण कार्य उत्साहजनक रूपमा अगाडि बढिरहेको छ। आफ्नै आधुनिक तथा सुविधासम्पन्न प्रशासकीय भवन निर्माणको सपना साकार हुने चरणमा पुग्दा गाउँपालिका, कर्मचारी तथा स्थानीयवासीमा नयाँ उत्साह थपिएको छ।
गाउँपालिकाले खोक्खोला–साजबारी क्षेत्रमा निर्माण गरिरहेको प्रशासकीय भवनको काम हाल मध्य चरणमा पुगेको छ। गाउँपालिकाका प्रमुख प्रशासकीय अधिकृत वीरबहादुर पुनका अनुसार हालसम्म भवन निर्माणमा करिब ३४ प्रतिशत भौतिक प्रगति र २५ प्रतिशत वित्तीय प्रगति हासिल भएको छ। निर्माण कार्य निर्धारित समयमै सम्पन्न गर्ने लक्ष्यसहित काम अगाडि बढिरहेको उहाँले जानकारी दिनुभयो।
महेन्द्रलक्ष्मी निर्माण सेवा तथा रिलायन्स इन्जिनियरिङ बिल्डर्स प्रालि, काठमाडौंसँग ६ करोड २ लाख ६७ हजार ५ सय ९० रुपैयाँ ७९ पैसाको लागतमा ठेक्का सम्झौता गरिएको छ। सम्झौताअनुसार २०८४ भदौ १७ गतेसम्म निर्माण कार्य सम्पन्न गरिसक्ने लक्ष्य राखिएको छ।
गाउँपालिकाका प्राविधिक शाखा प्रमुख इन्जिनियर दीपककुमार सारूका अनुसार भवन निर्माणका लागि करिब ९ करोड ७४ लाख रुपैयाँको लागत अनुमान तयार गरिएको थियो। सोही अनुसार आधुनिक आवश्यकताहरूलाई समेटेर भवनको डिजाइन तथा संरचना तयार पारिएको उहाँले बताउनुभयो।
निर्माणाधीन भवनलाई सबै नागरिकले सहज रूपमा उपयोग गर्न सकून् भन्ने उद्देश्यले पूर्ण रूपमा अपाङ्गमैत्री बनाइने भएको छ। भवनको प्रत्येक तल्लामा खानेपानीको व्यवस्था गरिनेछ भने महिला र पुरुषका लागि छुट्टाछुट्टै शौचालयको सुविधा रहनेछ। त्यस्तै, विभिन्न कार्यक्रम, बैठक तथा सार्वजनिक छलफल सञ्चालन गर्न दुईवटा सुविधासम्पन्न सभाहल निर्माण गरिने योजना रहेको छ।
भवन परिसरलाई पनि आकर्षक र व्यवस्थित बनाइनेछ। सवारी साधन पार्किङको पर्याप्त व्यवस्था गरिनुका साथै भवन वरपर हरियाली र फूलबारी निर्माण गरिनेछ। यसले कार्यालय परिसरलाई थप सुन्दर र सेवाग्राहीमैत्री बनाउने अपेक्षा गरिएको छ।
गाउँपालिका अध्यक्ष विष्णुप्रसाद भण्डारीले प्रशासकीय भवन निर्माण सम्पन्न भएपछि सार्वजनिक सेवा प्रवाहमा उल्लेखनीय सुधार आउने विश्वास व्यक्त गर्नुभयो। उहाँका अनुसार हाल विभिन्न भवनबाट सेवा सञ्चालन गर्नुपरेकाले सेवाग्राही र कर्मचारी दुवैले केही असहजता भोग्नुपरेको छ। नयाँ भवन निर्माणपछि सबै सेवा एकीकृत रूपमा सञ्चालन गर्न सहज हुने र सेवाको गुणस्तर समेत वृद्धि हुने अपेक्षा गरिएको छ।
“विविध चुनौती र प्राविधिक जटिलताका बीच पनि निर्माण कार्यलाई गति दिइएको छ। आफ्नो कार्यकालमै भवन निर्माण सम्पन्न गरी हस्तान्तरण लिने लक्ष्यका साथ हामी निरन्तर लागिरहेका छौँ,” अध्यक्ष भण्डारीले भन्नुभयो।
रम्भा गाउँपालिकाले लामो समयसम्म केन्द्र निर्धारणसम्बन्धी विवादका कारण आफ्नै प्रशासकीय भवन निर्माण गर्न सकेको थिएन। केन्द्र निर्धारणको प्रक्रिया टुंगिएपछि वडा नं. ३ को खोक्खोला–साजबारी क्षेत्रमा स्थानीयवासीले दान गरेको जग्गामा भवन निर्माणको काम सुरु गरिएको हो। स्थानीय समुदायको सहयोग र सद्भावका कारण बहुप्रतीक्षित योजना कार्यान्वयनमा आएको गाउँपालिकाको भनाइ छ।
हाल गाउँपालिकाले खोक्खोला स्थित वडा नं. ३ कार्यालयको भवन, रकमा देवी आधारभूत विद्यालयको भवन तथा रिमिधा स्वावलम्बन बचत तथा ऋण सहकारी संस्थाको भवनबाट प्रशासनिक तथा अन्य सार्वजनिक सेवा प्रवाह गर्दै आएको छ। विभिन्न स्थानमा छरिएर सेवा दिनुपर्दा व्यवस्थापनमा कठिनाइ हुने गरेको भए पनि नयाँ भवन निर्माणपछि ती समस्या अन्त्य हुने अपेक्षा गरिएको छ।
स्थानीय शिक्षक हरिप्रसाद बस्यालका अनुसार भवन निर्माण कार्य सुरु भएसँगै गाउँपालिकामा कार्यरत कर्मचारी तथा रम्भावासी नागरिकमा उत्साह र खुसीको वातावरण सिर्जना भएको छ। “वर्षौँदेखि आफ्नै प्रशासकीय भवनको आवश्यकता महसुस हुँदै आएको थियो। अहिले निर्माण कार्यले गति लिएपछि गाउँपालिकाको संस्थागत विकासप्रति नागरिकको विश्वास अझ बलियो बनेको छ,” उहाँले भन्नुभयाे ।
स्थानीय तहलाई थप सबल, व्यवस्थित र सेवामुखी बनाउने दिशामा रम्भा गाउँपालिकाको प्रशासकीय भवन महत्वपूर्ण पूर्वाधारका रूपमा स्थापित हुने अपेक्षा गरिएको छ। निर्माण सम्पन्न भएपछि एउटै परिसरबाट गुणस्तरीय, छिटोछरितो र प्रभावकारी सेवा उपलब्ध गराउन सहज हुने विश्वास गरिएको छ। यसले गाउँपालिकाको प्रशासनिक क्षमता अभिवृद्धि गर्नुका साथै सुशासन र नागरिकमैत्री सेवा प्रवाहलाई समेत थप मजबुत बनाउनेछ।
