काठमाडौं । नेपाल प्रेस इन्स्टिच्यूट (एनपीआई) ले पत्रकारको तथ्य जाँच तथा फिचर लेखन क्षमता अभिवृद्धि गर्न एकमहिने विशेष तालिम सुरु गरेको छ । सूचना तथा सञ्चार मन्त्रालयको सहयोगमा सञ्चालन भइरहेको ‘सूचना र समाचारमा तथ्य जाँच तथा फिचर समाचार लेखन’ सम्बन्धी तालिममा सुरु गरेको हो ।
गत असार ५ गतेबाट सुरु भएको उक्त तालिममा देशका विभिन्न जिल्ला तथा सञ्चारमाध्यममा कार्यरत अमेरिकाका एकना जना गरी ४५ जना पत्रकार सहभागी छन् । एनपीआईका अध्यक्ष तथा कार्यक्रम संयोजक कपिल काफ्लेले पत्रकारितामा सूचना प्रवाह तीव्र बन्दै गएकाले तथ्य जाँचको आवश्यकता र फिचर लेखमा बढी जोड दिनु पर्ने समय आएको बताउँदै तालिम जारी रहेको बताउनु भयो । उहाँले पत्रकारले तथ्यमा आधारित सामग्री उत्पादन गर्न सक्ने क्षमता विकास गर्नु कार्यक्रमको मुख्य उद्देश्य रहेको जानकारी दिनुभयो ।
तालिममा सहभागी पत्रकारहरूले फिचर पत्रकारिताको सिद्धान्त, अभ्यास, चुनौती, सम्भावना तथा अन्तर्राष्ट्रिय अभ्यासबारे प्रशिक्षण प्राप्त गरिरहेका छन् । कार्यक्रमअन्तर्गत वरिष्ठ पत्रकार, सम्पादक तथा प्राध्यापकहरूले विभिन्न विषयमा सहजीकरण गरिरहेका छन् ।
वरिष्ठ पत्रकार मोहन मैनालीले नेपाली फिचर पत्रकारितामा विषय छनोट, अनुसन्धान र प्रस्तुतीकरणका क्षेत्रमा सुधार आवश्यक रहेको बताउनुभयो । पत्रकार तथा एनपीआईका पूर्वअध्यक्ष तीर्थ कोइरालाले फिचर पत्रकारिताले समाजका गहिरा विषय र मानवीय पक्षलाई उजागर गर्ने भएकाले यसको महत्व बढ्दै गएको धारणा राख्नुभयो ।
प्राध्यापक चिरञ्जीवी खनालले सामाजिक सञ्जाल र डिजिटल माध्यमको विस्तारसँगै भ्रमपूर्ण सूचना र गलत जानकारीको चुनौती बढेको उल्लेख गर्दै तथ्य जाँच पत्रकारिताको महत्वबारे प्रशिक्षण दिनुभएको छ । पत्रकार सविन धमलाले डिजिटल युगमा फिचर सामग्रीको बढ्दो माग र बजार सम्भावनाबारे जानकारी गराउनुभएको थियो ।
त्यसैगरी प्राध्यापक पर्शुराम खरेलले फिचर लेखनमा प्रयोग हुने अवधारणा, अन्तर्राष्ट्रिय अभ्यास तथा मापदण्डबारे प्रशिक्षण दिनुभएको छ भने पत्रकार पुष्कर माथेमाले फिचरको संरचना, भाषा र प्रस्तुति शैलीबारे सहजीकरण गर्नुभएको छ । एनपीआईले तालिमलाई व्यवहारिक अभ्याससँग जोडेको जनाएको छ । तालिमको प्रथम चरण सकिएको छ । अब दोस्रो चरणमा सहभागी पत्रकारहरूले एक महिनासम्म फिचर लेखन अभ्यास गर्नेछन् । यस अवधिमा उनीहरूलाई अनुभवी सम्पादक तथा प्रशिक्षकहरूको प्रत्यक्ष मार्गदर्शन उपलब्ध गराइनेछ ।
फिचर लेखन अभ्यासका लागि तीर्थ कोइराला, पुष्कर माथेमा, मन्टेश्वरी राजभण्डारी, विज्ञान शर्मा र कपिल काफ्लेमध्ये एक जनालाई प्रत्येक सहभागीको गाइडका रूपमा जिम्मेवारी दिइने भएको छ । करिब ११ जना सहभागी बराबर एक जना गाइड रहने व्यवस्था गरिएको एनपीआईले जनाएको छ ।
एनपीआईका अनुसार कार्यक्रमको उद्देश्य तथ्यमा आधारित, अनुसन्धानमुखी र मानवीय संवेदनाले भरिएका फिचर सामग्री उत्पादन गर्न सक्ने पत्रकार तयार गर्नु हो । सहभागी पत्रकारहरूले आफ्नो कार्यक्षेत्रका सार्वजनिक सरोकारका विषयमा फिचर तयार गर्नेछन् ।
प्रकाशित मिति: सोमबार, असार ८, २०८३ १५:४८
