उदयपुर । उदयपुरको कटारी नगरपालिका-३, हडैयामा विहीबार भएको एक हृदयविदारक घटनामा पौडी खेल्ने क्रममा एकै घरका तीन बालकको डुबेर मृत्यु भएको छ। एउटै परिवारका तीन बालकको एकैपटक ज्यान गएपछि गाउँ नै शोकमा डुबेको छ भने मृतकका परिवारजनको रुवाबासीले सम्पूर्ण बस्ती भावविह्वल बनेको छ।
इलाका प्रहरी कार्यालय कटारीका प्रमुख प्रहरी नायब उपरीक्षक (डिएसपी) उपेन्द्र खरेलका अनुसार मृत्यु हुने तीनैजना दुई दाजुभाइका छोराहरू हुन्। मृत्यु हुनेमा जितलाल दनुवारका ११ वर्षीय छोरा सुमितकुमार दनुवार, सात वर्षीय छोरा सुगमकुमार दनुवार तथा उनका भाइ अतिल दनुवारका आठ वर्षीय छोरा आदित्यकुमार दनुवार रहेका छन्।
प्रहरीका अनुसार शुक्रबार दिउँसो घर नजिकै खेलिरहेका तीनै बालक हडिया खोलामा पानी जमेर बनेको गहिरो खाल्डोमा पौडी खेल्न गएका थिए। पौडी खेल्ने क्रममा उनीहरू एक्कासि गहिरो भागमा पुगेपछि डुबेका थिए। लामो समयसम्म घर नफर्किएपछि परिवारजन र स्थानीयवासीले खोजी सुरु गरेका थिए। त्यसक्रममा खोलाको खाल्डोमा उनीहरू डुबिरहेको अवस्थामा फेला परेका थिए।
स्थानीयवासीले तत्काल तीनै बालकलाई पानीबाट बाहिर निकालेर उद्धार गरेका थिए। उद्धारपछि उनीहरूलाई तत्काल उपचारका लागि कटारी अस्पताल पुर्याइएको थियो। तर अस्पतालमा कार्यरत चिकित्सकले परीक्षणपछि तीनै बालकलाई मृत घोषणा गरेका थिए। उपचारका लागि अस्पताल पुर्याउँदासम्म उनीहरूको अवस्था अत्यन्त गम्भीर रहेको बताइएको छ।
डिएसपी खरेलले घटनाको पुष्टि गर्दै तीनै बालक एउटै परिवारका सदस्य रहेको र पौडी खेल्ने क्रममा दुर्घटनावश डुबेर मृत्यु भएको प्रारम्भिक अनुसन्धानबाट खुलेको जानकारी दिए। उनका अनुसार घटनाबारे थप अनुसन्धान भइरहेको छ।
प्रहरीले तीनै बालकको शव पोस्टमार्टमका लागि कटारी प्रादेशिक अस्पतालमा राखिएको जनाएको छ। पोस्टमार्टम प्रक्रिया पूरा भएपछि शव परिवारलाई जिम्मा लगाइने तयारी गरिएको छ।
घटनापछि हडैया क्षेत्र शोकाकुल बनेको छ। एकै परिवारका तीन बालकको असामयिक निधनले स्थानीयवासी स्तब्ध भएका छन्। मृतकका आफन्त तथा छिमेकीहरू अस्पताल र घरमा भेला भएका छन् भने परिवारजनको रुवाबासीले वातावरण अत्यन्त मर्माहत बनेको स्थानीयले बताएका छन्।
स्थानीय बासिन्दाले वर्षायाममा खोलानाला तथा पानी जमेका खाल्डाखुल्डीमा बालबालिका खेल्न र पौडी खेल्न जाने क्रम बढ्ने भएकाले अभिभावकले विशेष सतर्कता अपनाउनुपर्ने बताएका छन्। साथै स्थानीय तहले पनि जोखिमयुक्त स्थानको पहिचान गरी आवश्यक सुरक्षा व्यवस्था गर्नुपर्ने माग स्थानीयवासीले गरेका छन्।
प्रहरीले वर्षायाममा नदी, खोला, पोखरी तथा पानी जमेको गहिरो खाल्डोमा बालबालिकालाई एक्लै जान नदिन अभिभावकलाई आग्रह गरेको छ। विशेष गरी बाढी र वर्षाका कारण बनेका पानीका खाल्डाहरू बाहिरबाट सामान्य देखिए पनि भित्र गहिरा र जोखिमपूर्ण हुन सक्ने भएकाले सतर्क रहन प्रहरीले अनुरोध गरेको छ।
प्रकाशित मिति: शुक्रबार, साउन १५, २०८३ ०६:३६
