उदयपुर । जंगली हात्तीले घर भत्काएपछि बेसहारा बनेकी उदयपुरकी ७६ वर्षीया दलमाया रिखाम मगरले दसैँको मुखमा नयाँ घर पाएकी छन् । वैदेशिक रोजगारीका लागि कतारमा रहेका उदयपुरका युवाहरूले आर्थिक सहयोग जुटाएर त्रियुगा नगरपालिका–७ तिलबारीकी दलमायाका लागि घर बनाइदिएका हुन् ।
प्रवासी सेवा समाज कतार उदयपुरको पहलमा निर्माण गरिएको एकतले टिनको छाना भएको घर बिहीबार एक कार्यक्रमबीच दलमायालाई हस्तान्तरण गरिएको हो । गएको माघमा जंगली हात्तीले उनको पुरानो घर भत्काइदिएको थियो । त्यसपछि घरविहीन बनेकी दलमायाले दसैँको मुखमा नयाँ घर पाएकी हुन् ।
समाजका महासचिव सञ्जीप कटुवालका अनुसार कतारमा वैदेशिक रोजगारीमा रहेका उदयपुरे युवाहरूबाट दुई लाख रुपैयाँ संकलन गरेर घर निर्माण गरिएको हो । संकलित रकमबाट बजारमा खरिद गर्नुपर्ने निर्माण सामग्री ल्याइएको थियो । स्थानीयवासीले पनि काठपात, ढुंगा, गिट्टी र बालुवा सहयोग गरेका थिए ।
‘कतारमा रहेका उदयपुरे युवाहरूबाट दुई लाख रुपैयाँ संकलन गर्यौँ । त्यसबाट आवश्यक निर्माण सामग्री किन्यौँ । स्थानीयवासीले पनि सामग्री सहयोग गर्नुभयो । सबैको सहयोगमा घर निर्माण गरेर हस्तान्तरण गर्न सफल भएका छौँ,’ कटुवालले भने ।
दलमायाले १५ वर्षअघि श्रीमान् गुमाएकी थिइन् । उनका एक छोरा भए पनि उनी काठमाडौंमा बस्दै आएका छन् । एक्लै बस्दै आएकी दलमाया एकल महिला भत्ताको रकम र आफन्तको सहयोगमा गुजारा चलाउँदै आएकी छन् । पुरानो घरसमेत हात्तीले भत्काइदिएपछि उनको बसोवास थप कष्टकर बनेको थियो ।
समाजका पूर्वअध्यक्ष होमबहादुर बस्नेतका अनुसार दलमायाको पुरानो घर थाकल र माटोले बनेको थियो । जंगली हात्तीले घर भत्काएपछि उनलाई सुरक्षित आवासको आवश्यकता परेको थियो ।
‘पहिले थाकल र माटोले बनेको फुसको घर थियो । गएको माघमा जंगली हात्तीले भत्काइदिएपछि उहाँ घरविहीन हुनुभएको थियो । संस्थाको पहलमा घर निर्माण गरेर हस्तान्तरण गर्न पाउँदा खुसी लागेको छ,’ बस्नेतले भने ।
नयाँ घर पाएपछि दलमाया पनि खुसी छन् । वर्षौँदेखि अभावमा गुजारा चलाउँदै आएकी उनले अब आफ्नै सुरक्षित घरमा दसैँ मनाउन पाउने भएकी छन् । ‘एकल महिला भत्ता र आफन्तको सहयोगमा खाद्यान्नको जोहो गर्दै आएकी छु । अब नयाँ घरमा दसैँ मनाउने छु,’ उनले भनिन् ।
समाजले त्रियुगा नगरपालिका–७ का वडासदस्य प्रेम कार्की, उदयपुरगढी गाउँपालिका–७ का वडाध्यक्ष भुवन केप्छाकी मगर तथा स्थानीयवासीको रोहवरमा घर हस्तान्तरण गरेको हो । वैदेशिक रोजगारीका क्रममा कतारमा रहेका युवाहरूले गाउँकी वृद्धाका लागि जुटाएको सहयोगले दलमायालाई सुरक्षित आवाससँगै दसैँमा नयाँ आश्रय पनि दिएको छ ।
प्रकाशित मिति: बिहीबार, असोज २९, २०८३ १६:३२
