धरान, सुनसरी । विराटनगरबाट साथीहरुसँगै घुम्न आएकी मनिशा मेहेता धरान उपमहानगरपालिका-२० स्थित चिण्डे डाँडामाको सेछ एड्भेन्चर एण्ड होलिडेज पार्कमा रमाइरहेको अवस्थामा भेटियो ।
धरानबाट ३ किलोमिटर हाइकिङ गर्दै यहाँ आइपुगेकी मेहेताले पहिलो पटक जिपलाइन साइक्लिङ गर्न पाउँदा खुसी भएको बताइन्।
विराटनगरकै पिङ्की शर्माले फेसबुक र टिकटकमा मात्र यो पार्क देखेको थियो । प्रत्यक्ष यहाँ आइपुग्दा सामाजिक सञ्जालमा देखेभन्दा राम्रो लागेको शर्माको प्रतिक्रिया थियो । “सोचेभन्दा राम्रो रहेछ, अरु साथीहरुलाई यहाँ घुम्न आउन अनुरोध गर्छु”, उनले भनिन्।
मनिशा र पिङ्की मात्रै होइनन्, सेछ एड्भेन्चर एण्ड होलिडेज पार्क घुम्नका लागि अधिकांश युवाको रोजाइमा पर्न थालेको छ । यहाँ पछिल्लो समय आन्तरिक पर्यटकको भीड लाग्न थालेको छ ।
धरानको मुख्य बजारबाट ६ किलोमिटर दूरीमा रहेको यहाँ कोही ‘हाइकिङ’ गर्दै त कोही सवारीमा पुग्ने गर्छन्। यहाँ साइक्लिङ जिपलाइन र प्यारालाइडिङ जस्ता साहसिक खेलहरु खेल्न आन्तरिक पर्यटक आउन थालेका हुन् ।
पहिले उजाड र सुनसान गाउँका रुपमा रहेको यहाँ चार वर्षअघि मात्र पार्क निर्माण गरिएको हो। साइक्लिङ जिपलाइन, हेडिङ ब्रिज, रसियन सर्कल, चिल्ड्रेन पार्क यहाँको मुख्य आकर्षण रहेको पार्कका निर्देशक वासुदेव बरालले बताए । निर्देशक बरालले भने, “हाम्रो प्रदेशमै पहिलो पटक एक मात्र एडभेन्चर पार्क सञ्चालन गरेका छौँ, पर्यटकले रुचाइदिनुभएको छ ।”
पार्कमा वनभोजका लागि आउने विद्यार्थीहरुको घुइँचो लाग्ने गरेको निर्देशक बरालले बताए । पार्कले विभिन्न प्याकेज उपलब्ध गराएपछि पनि आन्तरिक पर्यटक तथा क्याम्पस तहका विद्यार्थीहरुको आकर्षण बढेको हो ।
सुरुमा ५ करोडको लगानीमा निर्माण गरिएको सेछ पार्कमा हाल केही नयाँ संरचना निर्माण गरिएसँगै लगानी सात करोड पुगेको जनाइएको छ। पार्क अढाई बिघा क्षेत्रफलमा फैलिएको छ ।
प्रकाशित मिति: शनिबार, पुस १३, २०८१ १४:५१
