काठमाडौ । नेपाल–जापान कूटनीतिक सम्बन्धको ७० औँ वर्षगाँठमा जापानी खानासँगै संस्कृतिको उत्सव मनाउँदै आएको छ ।
होक्काइडो ग्रुप नेपाल र जापानबीच कूटनीतिक सम्बन्ध स्थापना भएको ७०औँ वर्षगाँठका अवसरमा दुई देशबीचको सांस्कृतिक सम्बन्धलाई खानामार्फत जोड्ने उद्देश्यले काठमाडौंमा जापानी फुड फेस्टिभल आयोजना भएको हो।
होक्काइडो ग्रुप र र्याडिसन काठमाडौँको सहकार्यमा सञ्चालन भइरहेको यस फेस्टिभलले जापानी खानाको परम्परा, पाककला र सांस्कृतिक अभ्यासलाई नेपाली आगन्तुकमाझ प्रस्तुत गरेको छ ।
काठमाडौंको लाजिम्पाटस्थित र्याडिसन काठमाडौँ परिसरमा रहेको होक्काइडो एसियन कुजिनमा नोभेम्बर ३ देखि ९, २०२६ सम्म सञ्चालन भइरहेको फेस्टिभलमा जापानी खानाका विभिन्न परिकारसँगै प्रत्यक्ष पाककला प्रदर्शन तथा सांस्कृतिक गतिविधि समावेश गरिएकाे छ ।
साँझ ५ बजेदेखि ८ बजेसम्म सञ्चालन हुने कार्यक्रममा जापानी डिनर बुफे तथा अनलिमिटेड सुसी उपलब्ध गराइएको छ । प्रतिव्यक्ति ३ हजार रुपैयाँ शुल्क निर्धारण गरिएको बुफेमा एउटा सफ्ट ड्रिंक, लागू हुने कर तथा सेवा शुल्कसमेत समावेश छन् ।
कार्यक्रमको व्यवस्थापन र आगन्तुकलाई सहज अनुभव प्रदान गर्ने उद्देश्यले प्रत्येक दिन ७० जनाका लागि मात्र सहभागिता सीमित गरिएको आयोजकले जनाएको छ । फेस्टिभलको प्रमुख आकर्षण जापानबाट आएका सुसी कलाकार काजुयुकी हायाशी (Kazuyuki Hayashi) को प्रत्यक्ष पाककला प्रस्तुति रहेको छ ।
हायाशीले आगन्तुककै अगाडि सुसी तयार गर्ने प्रदर्शनमार्फत जापानी पाककलाको शैली, सीप र परम्परालाई प्रस्तुत गरिरहेका छन् । फेस्टिभलमा निगिरी सुसी, होसोमाकी रोल, तेप्पान्याकीलगायत जापानी खानाका विभिन्न परिकार समावेश गरिएको छ ।
करिब ४८ परिकारलाई नौ वटा फरक विधामा प्रस्तुत गरिएको यस फेस्टिभलले जापानी खानाको विविधता र त्यसको तयारी शैलीबारे बुझ्ने अवसर प्रदान गरेको छ। खानामा मात्र सीमित नरही फेस्टिभलमा जापानी क्यालिग्राफी र माचा चिया बनाउने परम्परागत विधिको प्रदर्शनसमेत समावेश गरिएको छ ।
जापानी क्यालिग्राफीले अक्षर लेखनलाई कलात्मक अभिव्यक्तिसँग जोड्छ भने माचा जापानी चिया संस्कृतिको महत्त्वपूर्ण हिस्सा हो । यस वर्ष होक्काइडो ग्रुपले आफ्नो स्थापनाको सातौँ वार्षिकोत्सवसमेत मनाइरहेको छ ।
सन् २०१९ मा नेपालमा आफ्नो व्यावसायिक यात्रा सुरु गरेको समूहले सात वर्षको अवधिमा जापानी खानामा आधारित रेस्टुरेन्ट व्यवसाय विस्तार गर्दै आएको छ । समूहका संस्थापक अर्जुन अधिकारीले जापानमा प्राप्त गरेको आतिथ्य सेवा र पाककलासम्बन्धी अनुभवलाई नेपालमा विस्तार गर्ने सोचसहित व्यवसाय सुरु गरेका हुन् ।
पार्क भिलेज रिसोर्टबाट सुरु भएको होक्काइडो ग्रुपको व्यावसायिक यात्रा अहिले काठमाडौं उपत्यका, पोखरा र चितवनसम्म विस्तार भएको छ । समूहले हाल १० वटा रेस्टुरेन्ट तथा आउटलेट सञ्चालन गरिरहेको जनाएको छ ।
नेपाल–जापान कूटनीतिक सम्बन्धको ७०औँ वर्षगाँठ र आफ्नो स्थापनाको सातौँ वार्षिकोत्सवलाई एकैसाथ जोडेर आयोजना गरिएको यो फेस्टिभल होक्काइडो ग्रुपको व्यावसायिक यात्रासँगै सांस्कृतिक आदानप्रदानको एउटा अवसरका रूपमा पनि रहेको छ ।
र्याडिसन काठमाडौँसँगको सहकार्यमा आयोजित कार्यक्रमले जापानी खानाको स्वाद, पाककला र सांस्कृतिक परम्परालाई एउटै स्थानमा प्रस्तुत गरेको छ । यसले काठमाडौंको आतिथ्य क्षेत्रमा अन्तर्राष्ट्रिय खानाको अनुभवलाई थप विविध बनाउनुका साथै नेपालमा जापानी खानाको पहिचान विस्तार गर्ने अवसर प्रदान गरेको छ ।
कार्यक्रमबारे थप जानकारी तथा टेबल आरक्षणका लागि ९७७-९८०१०११३०२ मा सम्पर्क गर्न सकिनेछ ।
