नवलपुर, नवलपरासी । राजनीतिलाई पेसाको रुपमा सम्झने समाजमा यहाँका जनप्रतिनिधिले च्याउ खेतीलाई आफ्नो पेसा बनाएको छ।
नवलपुरको मध्यविन्दु-३ का वडाध्यक्ष मानबहादुर महतोले एमडी कृषि तथा पशुपंक्षी फर्म दर्ता गरी आफ्नै घरमा व्यावसायिक रुपमा च्याउ खेती गर्दै आएको हो ।
वडाध्यक्ष महतोले ४ सय ५० वर्गफुटमा टनेल बनाएर पाते च्याउ तथा ७ सय २० वर्गफुटमा टनेल बनाई डल्ले च्याउको व्यावसायिक खेती गर्दै आएको छ। संरचना बाहेक च्याउ खेती गर्दा आफूले करिब २ लाख ७५ हजार लगानी गरेको उल्लेख गर्दै वडाध्यक्ष महतोले खेतीबाट आफू सन्तुष्ट रहेको बताए।
महतोले उत्पादन गरेको च्याउ घरबाटै बिक्री हुने गरेको भन्दै उनले धेरै भएको च्याउ चोरमारा, अरुण खोला, डण्डा, कावासोती तथा नारायणगढको तरकारी बजारसम्म पुर्याउने गरेको बताए । दुवै च्याउबाट उत्पादन राम्रो भए पनि उत्पादन र मागबीच सन्तुलन नहुँदा बजारीकरणको समस्या भएको महतोको भनाई छ । राज्यले अब उत्पादनसँग जोडिनु पर्छ भनेपछि अन्य नागरिकलाई पनि प्रोत्साहन गर्न आफू व्यावसायिक कृषि कर्ममा जुटेको उनको भनाइ छ ।
कृषिमा राज्यले अनुदान दिइरहेको भए पनि आफूले अहिलेसम्म कुनै पनि अनुदान नलिएको उनले बताए। दिनभरी वडावासीको काममा समर्पित भए पनि फुर्सदको समय च्याउ खेतीमा दिने भन्दै उनले यस खेतीमा आफ्नो परिवारबाट समेत साथ मिलेको बताए।
सबै जनाले एकै प्रकारको खेती गर्न सुरु गर्दा उत्पादन बढी र माग थोरै हुने भन्दै निर्यात गर्ने गरी उत्पादन गर्न राज्यले सहयोग गर्नुपर्ने उनले बताए। च्याउमा कुनै पनि विषादी प्रयोग नहुने भन्दै उनले उत्पादक र उपभोक्ता दुवै स्वस्थ हुने बताए ।
सिजन अनुसार पाते च्याउ १ सय ३० देखि २ सयसम्म तथा डल्ले च्याउ ४ सय ५० देखि ६ सयसम्म प्रतिकिलो बिक्री हुने गरेको उनको भनाइ छ। प्रविधि भित्र्याउँदै च्याउ खेतीलाई विस्तार गर्दै अगाडि बढ्ने योजना रहेको उनी बताउँछन् ।
प्रकाशित मिति: शुक्रबार, माघ ४, २०८१ ०८:५९
