काठमाडौ । मुलुकमा अपराधका घटनाहरु बढेको प्रहरीले जनाएको छ ।
गत वर्षको चैतदेखि असारसम्म ३ महिनाको तुलनामा यस वर्षको सोही अवधिमा मुद्दा दर्ता ११ प्रतिशतले बढेको हो ।
यस्तै पक्राउ पर्नेको सङ्ख्या ११ दशमलव २२ प्रतिशतले बढेको प्रहरी नायब महानिरीक्षक एवं नेपाल प्रहरीका प्रवक्ता कुबेर कडायतले जानकारी दिएका हुन्।
साइबर अपराधका मेद्दा सबैभन्दा बढी उजुरी परेको जनाउँदै उनले प्रहरीले अघिल्लो तीन महिनाको तुलना गर्दा बैंकिङ कसुरका मुद्दा दोब्बरले बढेको बताए।
उनका अनुसार प्राप्त विवरणमा गत वर्षको तीन महिनामा १ हजार ८ सयको हाराहारीमा बैंकिङ कसुरका मुद्दा दर्ता भएकामा यस वर्ष त्यो सङ्ख्या बढेर ३ हजार ५ सयभन्दा बढी छन् ।
प्रहरीका अनुसार यस अवधिमा कूल ३ हजार ५ सय ६२ जना फरार अपराधीलाई पक्राउ गरिएको छ । उनीहरुबाट १ हजार ८ सय ७० वर्ष १० महिना २५ दिन कैद असुल गरिएको छ भने तोकिएको रू ३० करोड ३८ लाख १६ हजार रकम असुल गर्नुपर्ने देखिएको प्रहरी प्रवक्ता कडायतले बताए ।
उनका अनुसार उक्त अवधिमा गाँजा मात्रै ६ हजार ९ सय ६१ किलो, चरेस १ सय ७९ किलो, खैरो हेरोइन ४ किलो २५ ग्राम र अफिम ४ किलो ९८ ग्राम बरामद गरिएको छ ।
लागुऔषध ब्यूरोको विशेष अपरेसनमा रात्रिकालीन क्लबहरुमा गरिएको विशेष अपरेसनमा पाँच विदेशीसहित ११ जनालाई पक्राउ गरिएको छ।
प्रहरीले दिएको जानकारीअनुसार सहकारी ठगीका विषयमा प्रहरीले केही व्यक्तिलाई पक्राउ गरी कानुनी दायरामा ल्याएको छ। शिवशिखर बहुउद्देश्यीय सहकारी र तुलसी बहुमुखी सहकारीका शाखा कार्यालयहरुबाट १ लाख ८९ हजार ८ सय ७९ निक्षेपकर्ताहरुको १२ अर्ब २३ करोड ५१ लाख रकम दुरुपयोग भएको भेटिएको कडायतले बताए ।
उनका अनुसार उक्त रकम दुरुपयोगका आरोपमा सहकारीका सञ्चालक केदारनाथ शर्मालाई पक्राउ गरी कानुनी कारबाही थालिएको छ।
अन्य सहकारी ठगीतर्फ २ अर्ब ४४ करोड २१ लाख बिगो कायम गरी अन्य सहकारी ठगीका आरोपीविरुद्ध पाँचवटा मुद्दा दर्ता भएका छन् भने उक्त मुद्दमा संलग्न रहेको आरोपमा १३ जनालाई पक्राउ गरिएको छ ।
यस अवधिमा लामो हतियार १ सय ५३, छोटा हतियार १६, गोली १ सय ४७ र म्यागजिन ६ वटा बरामद गरिएको प्रहरीले जनाएको छ। प्रहरीका अनुसार ६ हजारभन्दा बढी हातहतियार भने नष्ट गरिएका छन् ।
सवारी दुर्घटना
प्रहरी प्रधान कार्यालयका अनुसार गएको चैत १५ देखि अहिलेसम्म तीन महिनाको अवधिमा ६ हजार ४ सय २० वटा सवारी दुर्घटना भएका छन्। ती दुर्घटनामा परेर ५ सय ८१ जनाको मृत्यु भएको छ भने १ हजार ७ सय २१ जना गम्भिर घाइते भएका छन्।
सवारी सम्बन्धमा ७ लाख ३६ हजारलाई कारबाही गरिएको छ । कारबाहीबापत ५६ करोड ४६ लाख राजस्व सङ्कलन गरिएको कडायतले बताए। उक्त अवधिमा १ अर्ब ५९ करोड ६२ लाखको अवैध सामान बरामद गरिएको छ ।
विपद् व्यवस्थापनमा १० हजार जनशक्ति
प्रहरी प्रधान कार्यालयका अनुसार विपद् व्यवस्थापनमा १० हजार ८५ जना जनशक्ति तयार पारिएको छ । उनीहरुलाई चौबिसै घण्टा परिचालन गर्न सक्ने गरी तयारी अवस्थामा राखिएको छ ।
प्रहरीले राष्ट्रिय अपराध सूचना केन्द्रको स्थापना र विभिन्न कसुरको अनुसन्धान गर्ने निकायबीच साझा प्लेटफर्मका रुपमा विकास गर्ने प्रारम्भिक समझदारी भएको जानकारी दिएको छ ।
साथै नेतृत्व तहमा रहेका प्रहरी कर्मचारीबीच समन्वय र निर्णय प्रक्रियामा सामूहिक भावनाको विकास गर्न प्रहरी महानिरीक्षकबाट विभागीय प्रमुखलाई अधिकार प्रत्यायोजन गरिएको छ ।
निम्न दर्जाका प्रहरी कर्मचारीको चाहनाअनुरुप निवृत्तिभरणका लागि १६ वर्षमा नै अवकाशमा जान पाउने प्रावधानका लागि कानुन संशोधनको प्रस्ताव पेस गरिएको, अपराध अनुसन्धानमा लामो समय एकै ठाउँमा रहेका मुद्दा फाँटका कर्मचारीलाई सरुवा गरिएको, नयाँ भर्नाको दरखास्त प्रणालीलाई सहज बनाउन अनलाइन प्रणालीको विकास गरिएकोलगायत प्रशासनिक काम÷कारबाही सुधार भएको प्रहरीले तीन महिने प्रगति विवरणमा उल्लेख गरेको छ ।
त्यस्तै नेपाल प्रहरीको शोध, अध्ययन अन्वेषण कार्यादेश-२०८० स्वीकृत भएको तथा विशिष्टीकृत जनशक्ति परिचालन कार्यविधि स्वीकृत गरी विशिष्टीकृत तथा वैत्रानिक अपराध अनुसन्धान प्रणालीको विकास गर्ने लक्ष्य राखिएको जनाइएको छ।
