पोखरा, कास्की । नेपाल कम्युनिष्ट पार्टी (एकीकृत समाजवादी) का अध्यक्ष माधवकुमार नेपालले देशको अर्थतन्त्रमा देखिएको सङ्कटका कारण प्रभावित बनेका व्यवसायी र ऋणीहरुलाई सरकारले सहुलियत दिने कार्यक्रम ल्याउनु आवश्यक रहेको बताएको छ।
समाजवादी प्रेस सङ्गठन नेपाल कास्कीले पोखरामा आयोजना गरेको पत्रकार सम्मेलनमा अध्यक्ष नेपालले अहिले अर्थतन्त्र कामचलाउनको अवस्थामा छ भनेर चित्त बुझाएर बस्न नहुने उल्लेख गरेको हो।
अध्यक्ष नेपालले भने,“विभिन्न कारणले गर्दा धेरै व्यवसायीहरुको हालत अहिले खराब भएको छ। ऋणको ब्याज बढेको छ। ऋण तिर्न नसकेर गम्भीर सङ्कटमा परेका व्यवसायीलाई ऋण चुक्ता गर्ने समय बढाएर हुन्छ वा व्याजदर घटाएर हुन्छ जनतालाई राहत र तथा लगानीकर्ता र ऋणिलाई सहुलितय दिन बारेमा सरकारले सोच्नु पर्दछ।”
पूर्वप्रधानमन्त्री समेत रहेका अध्यक्ष नेपालले जनताका पीडा र बेदनाहरुलाई समाधान गर्ने गरी सरकारले काम गर्नुपर्नेमा जोड दिए।
अध्यक्ष नेपालले सरकारलाई बेथिति र विसङ्गति अन्त्यका लागि पटक पटक आफ्नो पार्टीले ध्यानकर्षण गराइएको स्मरण गर्दै उत्पादन वृद्धि गर्ने र युवालाई स्वदेशमा नै रहने वातावरण निर्माण गरिनुपर्नेमा जोड दिए।
एकीकृत समाजवादी चूनौतीहरु सामना गर्ने आँट राखेर सबै शक्तिलाई एकतावद्ध बनाएर अघि बढिरहेको उनले स्पष्ट पारे। “हामी कुनै पनि संकीर्णताको सिकार बन्दैनौँ, कसैप्रति आग्रह पूर्वाग्रह राख्दैनौँ । हाम्रो निम्ति राष्ट्र र जनता नै मुल कुरा हुन्। राष्ट्रियताको रक्षा, राष्ट्रिय हितको प्रवद्र्धन र स्वाभिमानको रक्षा हाम्रो निम्ति मुख्य कुुरा हुन्।” अध्यक्ष नेपालले भने।
गण्डकीमा एकीकृत समाजवादीलाई मन्त्रिपरिषद्मा सहभागिता नगराएर मुख्यमन्त्रीले सहमतिको पालना नगरेको अध्यक्ष नेपालले उल्लेख गर्दै उनले पार्टीलाई मन्त्रिपरिषद्मा सामेल गराउने विषयमा थप कुराकानी गर्ने स्पष्ट पारे।
केन्द्रीय, प्रदेश र स्थानीय सरकारले आफ्नो विकासको प्राथमिकता तोकेर त्यही अनुरुप काम गर्नुपर्ने अध्यक्ष नेपालले बताए।
प्रकाशित मिति: शनिबार, मंसिर २३, २०८० १९:५८
