म्याग्दी । म्याग्दीको बेनी नगरपालिका-९, गलेश्वरस्थित प्रसिद्ध धार्मिक स्थल गलेश्वर शिवालय मन्दिरमा दर्शन गर्ने भक्तजनको भीड लागेको छ।
महाशिवरात्रिको अवसरमा आज विहानैदेखि गलेश्वर शिवालय मन्दिरमा दर्शन गर्ने भक्तजनको भीड लागेको हो।
मुक्तिनाथ प्रवेशद्धारको रुपमा रहेको गलेश्वर शिवालय धर्मिक ऐतिहासिक र पौराणिक दृष्टिले महत्वपूर्ण धार्मिक स्थलको रुपमा परिचित छ।
नौ रोपनी क्षेत्रफलमा फैलिएको एउटै विशाल चक्रशीलामाथि अवस्थित गलेश्वर शिवालयमा भगवान शिबको पूजा आराधना र १०८ शिबलिङ्गमा जल अर्पणका लागि विहानैदेखि भक्तजनको भिड लागेको र लाइनमा बसेर पुजा गर्ने प्रवन्ध मिलाईएको गलेश्वर शिवालय क्षेत्र विकास कोषका सदस्य सचिब बलबहादुर खत्रीले जानकारी दिए।
उनका अनुसार, म्याग्दीका साथै, पर्वत, बागलुङ, कास्की, चितवन, नवलपरासी, रुपन्देही, स्याङ्जा, काठमाडौ, लगायतका ठाउँबाट भक्तजनहरु आएका छन्।
शिवरात्री पर्वको पूजालाई व्यवस्थित गर्न विभिन्न २४ वटा उपसमिति गठन गरी स्वंसेवक परिचालन गरेर सहज रुपमा पूजा आराधना र दर्शन गर्ने प्रवन्ध मिलाईएको क्षेत्रविकास कोषले जनाएको छ।
गलेश्वरमा विहान ५ बजेदेखि नै भक्तजन आएका थिए। विगतका बर्षको तुलनमा यस बर्ष अत्यधिक धेरै भक्तजनहरु आएको क्षेत्रविकास कोषले जनाएको छ।
शुक्रवार गलेश्वरमा करिब २५ हजार भक्तजनले पुजा आरधना र दर्शन गर्ने अनुमान गरिएको छ। गलेश्वर मन्दिरमा पूजा गर्न आउने भक्तजनलाई लक्षित गरी विद्यार्थी, शिक्षक, प्रहरी, सामुदायिक प्रहरी, क्लब तथा स्थानीय आमा समुहले स्वयंसेवकको रुपमा सहजीकरण गरेका छन्।
प्रकाशित मिति: शुक्रबार, फागुन २५, २०८० १२:५६
