म्याग्दी । म्याग्दीको अन्नपूर्ण गाउँपालिका-६ मा समुन्द्रि सतहदेखि ३ हजार २ सय १० मिटरको उचाईमा रहेको पुनहिलबाट मौसममा सुधार हुन थालेसँगै मनमोहक र रमणीय दृष्य देखिन थालेको छ ।
“चुरेन, पुथा, गुर्जा, धौलागिरि, मानापाथी, निलगिरि, अन्नपूर्ण, बराह शिखर, माछापुच्छ्रे, लमजुङ र मनास्लु हिमालका साथै सुर्योदयको अवलोकन गर्न पाउँदा मनमा उमंग छाउँछ । शितल हावापानी, शान्त वातावरण र पुनहिलको मनमोहक दृष्यले यात्राको दुख भुलाउँछ।” बेनीका आन्तरिक पर्यटक, ओस्कार श्रेष्ठले बताए ।
“अन्य समयमा सुख्खा हुने पुनहिल बर्खा ऋतुमा हरियाली हुन्छ । पर्यटकीय राजधानी पोखरा नजिकै सहज र आकर्षक गन्तव्य खोज्नेहरुको लागि चक्रीय अन्नपूर्ण पदयात्रामा समेटिएको पुनहिल/घोडेपानी आकर्षक र रोमाञ्चक गन्तब्य हो । पोखरादेखि कास्कीको नयाँपुलसम्म गाडी र त्यहाँदेखि पदयात्रा गरेर एकै दिनमा पुगिने घोडेपानीदेखि आधा घण्टाको उकालो हिडेपछि पुनहिल पुगिन्छ।” घोडेपानी, होटल व्यावसायी, डमबहादुर पुनले बताए।
म्याग्दीको बेनीदेखि अन्नपूर्ण गाउँपालिकाको केन्द्र पोखरेबगर हुदै साढे दुई घण्टामा सवारी साधन मार्फत घोडेपानी पुगिन्छ। पुनहिल र घोडेपानी पदयात्रामा निस्कनेहरू धम्पुस वा घान्द्रुकसम्म घुमेर आउन सक्छन् । घोडेपानीमा बास बसेका पर्यटकहरू सूर्योदय र हिमाल हेर्नका लागि मिर्मिरेमै पुनहिल पुग्छन् । सूर्योदयको बेलामा घामको झुल्कोसँगै देखिने हिमालको सुन्दरताले मन लोभ्याउँछ।
घोडेपानीमा दैनिक एक हजार जना बास बस्न सक्ने २५ वटा सुविधायुक्त होटलहरु रहेका छन्। गुराँसको जंगलको बिचमा अवस्थित घोडेपानीका होटलको कोठाबाटै हिमाल देखिन्छ । मगर संग्रहालय र संस्कृति तथा जिवनशैली पनि घोडेपानीको आकर्षण हो। पुनहिल भ्रमणका लागि अन्नपूर्ण गाउँपालिकालाई नेपालीले प्रतिव्यक्ति ५० र विदेशीले १ सय ५० का दरले प्रवेश शूल्क तिर्नुपर्छ।
प्रकाशित मिति: शनिबार, भदौ १५, २०८१ १६:५०
