भैरहवा, रुपन्देही । शनिबारको दिन भैरहवाको लागि ऐतिहासिक दिन भएको छ ।
नेपालकै दोश्रो अन्तरराष्ट्रिय विमानस्थल भए पनि अन्तर्राष्ट्रिय विमान पर्खिरहेको गौतमबुद्ध अन्तर्राष्ट्रिय विमानस्थलबाट शनिबार ३ वटा विमानहरुले उडान भरिरहेका छन् ।
विमानस्थल सुरु भएदेखि नै उडान सुरु गरेको जजीरा एयरलाईन्सले स्थगित गरेको उडान शनिबारदेखि फेरी सुरु गरेको छ।
शनिबार १ सय ७१ जना यात्रु लिएर आएको जजीराले एक बालक सहित १ सय ६८ यात्रु लिएर उडेको छ भने फ्लाई दुबई नेपाल एयरलाईन्स पनि आजैदेखि उडान सुरु गर्दैछन् । यससँगै भैरहवाबाट अन्तर्राष्ट्रिय उडान गर्ने विमानको संख्या ४ पुगेको छ।
जजीरा एयर सातामा ३ दिन उडान गर्दैछ । मंगलबार, बिहिबार र शनिबार विहान साढे ७ बजे भैरहवा आउने र साढे ८ बजे भैरहवाबाट कुवेतको लागि उड्नेछ विमानस्थलका महाप्रवन्धक प्रताप बाबु तिवारीले जानकारी दिए ।
यस्तै फ्लाई दुबईले दैनिक उडान गर्ने र दिउसो पौने २ बजे भैरहवा आउने तथा यसको एक घण्टा पछि दुबई फिर्ता जाने छ।
नेपाल एयरलाईन्सले सातामा ३ पटक काठमाडौं–भैरहवा–दुबई उडान गर्नेछ । आईतबार, सोमबार र बुधबार नेपाल एयरलाईन्स काठमाडौबाट १० बजे उडान गरि भैरहवा आउने र यहाबाट दुबई जानेछ ।
गौतमबुद्ध अन्तर्राष्ट्रिय विमानस्थलका महाप्रवन्धक प्रतापबाबु तिवारीका अनुसार ‘कतार एयरवेज, एयर अरेबिया लगायत अन्य अन्तर्राष्ट्रिय वायुसेवा कम्पनीहरु पनि भैरहवाबाट उडान गर्ने विषयमा छलफल भई रहेको छ ।
उनले अहिले भैरहवा विमानस्थल १८ घण्टा सञ्चालन भईरहेको र एक घण्टामा विमानस्थलमा दुई वटा अन्तर्राष्ट्रिय विमान सञ्चालन गर्न सक्ने क्षमता रहेको गौतमबुद्ध अन्र्तराष्ट्रिय विमानस्थलका महाप्रवन्धक तिवारीले बताए ।
भैरहवा तथा यस आसपासका यात्रुहरु भैरहवामै अवतरण गर्न पाउदा हर्षित भएका छन् स्थानीय अजय गुप्ता, यात्रु र यात्रु तिजन रानाले बताए। सोही विमानमार्फत भैरहवा आईपुगेका नेपालका लागि कुवेतका राजदूत घनश्याम लम्सालले पहिलो उडानबाट आउन पाउदा खुशी भएको बताए।
यसले नेपाल र कुवेत विचको सम्बन्ध प्रगाढ बनाउनुको साथै त्यहाका नेपाली नागरिकलाई आवात जावतमा सहज पु¥याउने नेपालका लागि कुवेती राजदूत घनश्याम लम्सालले बताए ।
विमानस्थल सञ्चालनमा आएसँगै यात्रुहरुले यसलाई भने अब निरन्तरता दिनु पर्ने धारणा राख्दै व्यवस्थापन चुस्त राख्नु पर्ने, सार्वजनिक यातायातको साधनको लगायतको विषयमा ध्यान दिन सुझाव दिएका थिए ।
गौतम बुद्ध विमानस्थलका महाप्रवन्धकले भने विमानस्थल नियमित सञ्चालनको विषयमा आशंका नगर्न आग्रह गरेको छ। विमानस्थल संचालनका लागि सरकारले पनि विभिन्न रणनीति अंगाल्दै भैरहवा विमानस्थलबाट सेवा दिने अन्तर्राष्ट्रिय वायुसेवा कम्पनीहरुलाई विभिन्न सुविधा दिएको छ।
सरकारले कम्पनीहरुलाई भैैरहवा विमानस्थलबाट सेवा प्रदानका लागि हवाई टिकटमा लाग्ने गरेको प्रति यात्रु ३ हजार रुपैयाँ यात्रु सेवा शुल्क र १ हजार रुपैयाँ लाग्ने पर्यटन शुल्क पूर्ण छुट, ग्राउण्ड ह्यान्डिलङमा ७५ प्रतिशत छुट, ल्याडिङ, पार्किङ र नेभिगेसन शुल्कमा पूर्ण छुट दिएको छ।
यसको अलावा काठमाडौं विमानस्थल भन्दा हवाई इन्धनमा पनि प्रतिकिलोलिटर एक सय अमेरिकी डलर छुट दिएको छ।
