भैरहवा, रुपन्देही । भैरहवा स्थित गौतमबुद्ध अन्तर्राष्ट्रिय विमानस्थलबाट अन्तर्राष्ट्रिय उडान भएसँगै यहाँका निजि क्षेत्र, पर्यटन व्यवसायी तथा स्थानियहरु उत्साहित भएका छन् । लामो समयदेखि मलिन देखिएका पर्यटन व्यवसायीहरुको मुहार उज्यालो भएका छन्।
गौतमबुद्ध अन्तर्राष्ट्रिय विमानस्थल निर्माण सँगै रुपन्देही तथा यस आसपास ठूला होटलहरुको पनि निर्माण सुरु भएको थियो। पाँच वटा ५ तारे होटल सहित करिब २ सय वटा होटलहरुको भविष्य बिमानस्थल सँगै अन्यौलमा रहेको थियो । अहिले विमानस्थल सञ्चालनसँगै होटल व्यवसायीहरु पनि हौसिएका छन् ।
शनिबार मात्र भैरहवा विमानस्थलबाट जजीरा एयरलाईन्स, फ्लाई दुबई र नेपाल एयर लाईन्सले अन्तर्राष्ट्रिय उडान सुरु गरेका छन्। एयर एसियाले भने करिब एक साता पहिलेदेखि नियमित उडान गरिरहेको छ । यस्तै कतार एयरवेज, एयर अरेबियाले पनि भैरहवाबाट उडानको लागि चासो देखाएका छन्।
गौतमबुद्ध अन्तर्राष्ट्रिय विमानस्थलका महाप्रवन्धक प्रताप बाबु तिवारीले लामो समयदेखि सञ्चालन हुन नसकेको विमानस्थल सञ्चालनमा आउदा उड्डयनकर्मी सहित समग्र क्षेत्रमा उत्साह थपिएको बताए ।
उडान बढ्दा विमानस्थलका कर्मचारी मात्र नभई समग्र पर्यटन व्यवसायीहरु तरंगित बनेका छन्। लुम्बिनी होटल संघका अध्यक्ष गोविन्द ज्ञवालीले चारवटा उडानले पर्यटन व्यावसायीमा आशा जगाएको लुम्बिनी होटल संघका अध्यक्ष अनिल ज्ञवालीले बताए।
पर्यटन व्यसाय सँगै निजि क्षेत्र पनि विमानस्थल सञ्चालनले हौसिएको छ । सिद्धार्थ उद्योग बाणिज्य संघका अध्यक्ष ठाकुरकुमार श्रेष्ठले उदघाटन भएको अढाई वर्षपछि भएको चहलपहलले निजि क्षेत्रमा उत्साह जागेको बताए ।
विमानस्थल सञ्चालन सँगै यसको निरन्तरतामा भने व्यावसायीहरुले आशंका व्यक्त गरेका छन् । म्यान पावर एजेन्सीहरुले भैरहवामा कार्यालय नराखेको, स्वास्थ्य परिक्षण गर्न अझै काठमाडौं नै धाउनु पर्ने, पहिलो पटक श्रमको लागि पनि काठमाडौं नै जानु पर्ने बाध्यता अझै रहेको छ। यसले व्यावसायीहरुलाई यसको निरन्तर सञ्चालन हुने विषयमा भने झस्काएको संघका अध्यक्ष श्रेष्ठले बताए।
गौतम बुद्ध विमानस्थलका महाप्रवन्धकले भने विमानस्थल नियमित सञ्चालनको विषयमा आशंका नगर्न आग्रह गरेको छ । जाडो महिनामा केही समस्या रहे पनि त्यसको पनि विकल्प खोजिएको उनले बताए ।
प्रकाशित मिति: आइतबार, कात्तिक २५, २०८१ १९:३४
