इलाम । यस वर्ष इलामको सन्दकपुरमा किसानले ३४ लाखभन्दा बढी अलैँची उत्पादन गरेको छ।
सन्दकपुर गाउँपालिका २ माइमझुवाका किसान गिरिराज खनालले मकैबारी मासेर लगाएको खेतीबाट ३० मन उत्पादन गरेको हो।
अलैँचीको मूल्य हाल १२ वर्ष यताकै उच्च अर्थात प्रतिमन १ लाख १५ हजार रहेको छ। गाउँगाउँमा पुगेका व्यापारीले महङ्गो मुूल्य लगाउने गरेका छन् । बजारमा ब्यापारीले एक लाख १० हजारभन्दा माथि खरिद गर्ने गरेका छन्।
निवर्तमान वडाध्यक्ष समेत रहेका खनालले २०७२ सालबाट व्यावसायिक रुपमा अलैँची खेती गर्दै आएको छ। अरु किसानले लगाएको अलैँची मासिँदा पनि आफूले सोही खेती नछाडेको र बिचमा दानाबाट समेत अलैँची उत्पादन गरेर जिल्ला बाहिरका किसान समक्ष विरुवा पुर्याएको उनले बताए ।
हाल अलैँची किसान खनालले ३३ रोपनी र २४ रोपनीका दुईवटा प्लटमा सो खेती गरेको छ। हिउँदको समयमा तुसारो पर्ने भएकाले यहाँ हिउँदका दिनमा तुसारोबाट जोगाउन ग्रीन नेट लगाउने गरिन्छ ।
यस वर्ष करिव ३० मन अलैँची उत्पादन गरेको छ । आगामी वर्षबाट अझैँ उत्पादन बढ्ने उनले बताए। अलैँची लगाएको तीन वर्षदेखि उत्पादन सुरु हुन्छ । गएको वर्ष लगाएको नयाँ विरुवाबाट समेत उत्पादन बढ्ने उनले बताए।
राजनीति गर्ने मान्छेले केही न केही काम गर्नु पर्ने उनको भनाई छ । राजनीति गर्न खर्च आवश्यक पर्ने भएकाले पनि केही काम गर्नु पर्ने जसका लागि आफूले कृषि पेशा गर्ने गरेको उनले बताए ।
अलैँची किसान खनालले मात्र हैन पूर्वी पहाडी जिल्लाका किसानले यस वर्ष अलैँचीबाट राम्रो मूल्य लिइरहेका छन्। इलाम उद्योग वाणिज्य संघ इलामका अध्यक्ष कृष्ण पौडेलका अनुसार पछिल्लो समय १ लाख १० हजार भन्दा वढि मूल्यमा राम्रो अलैँची बिक्ने गरेको छ। यो मुल्य अलैँचीको १२ वर्ष यताकै उच्च हो ।
व्यापार तथा निकासी प्रवद्र्धन केन्द्रका अनुसार बर्सेनी सवा चार अर्ब रुपैयाँ बराबरको अलैँची निकासी भइरहेको छ। चालु वर्ष २०८१/०८२ को पहिलो तीन महिनामा ७ सय (८३.७५प्रतिशत) मेट्रिक टन अलैँची मेची भन्सारबाट निर्यात भएको छ।
यो अघिल्लो वर्षको तुलनामा ४९ प्रतिशतले कमी हो । आव २०८०/०८१ यो अवधिमा १ हजार ५ सय (२५.९६ प्रतिशत) मेट्रिक टन अलैँची निर्यात भएको तथ्याङ्कमा उल्लेख छ ।
प्रकाशित मिति: आइतबार, मंसिर १६, २०८१ २०:१७
