नवलपुर, नवलपरासी । राष्ट्रिय गौरवको आयोजनाको रुपमा रहेको नारायणगढ-बुटवल सडक विस्तारको काम म्याद थप भएको ४ महिनापछि सुरु गरिएको छ ।
विसं २०७९ साउन २२ मा निर्माण सम्पन्न हुनुपर्ने यस योजनाको दोस्रो पटक थपिएको म्याद गत साउनमा सकिएको थियो।
आगामी साउन ८ गतेभित्र निर्माण सम्पन्न गर्नेगरी सरकारले म्याद थप गरेको आयोजनाले काम नै नगरी करिब साढे ४ महिना बितायो।
मनसुन, चाडपर्वलगायतका कारण देखाउँदै विस्तारको काम रोकेको निर्माण व्यवसायीले नोभेम्बर अन्तिम साताबाट विस्तारको काम सुरु गरेको हो ।
नारायणघाट बुटवल सडक योजना पूर्वीखण्डका सूचना अधिकारी इन्जिनियर शिव खनालका अनुसार अहिले सडक विस्तारमा ३ सय २३ जना श्रमिक परिचालन गरिएको छ । यस खण्डमा बनेका १६ वटा पुलमा अप्रोज रोड बनाउनु पर्नेमा अहिले ९ वटामा काम भइरहेको र बाँकी ७ वटामा पनि चाँडै काम सुरु हुने उनले बताए ।
त्यसैगरी, २ सय ३२ कल्भर्टमध्ये १ सय ८१ वटा निर्माण सम्पन्न तथा १४ वटाको काम हुँदै गरेको भन्दै खनालले ९ स्थानमा सडक किनारमा ढुङ्गाको पर्खाल लगाउने काम भइरहेको बताए ।
यस खण्डमा पर्ने ६५ किलोमिटर सडकमध्ये ३५ किलोमिटर सडक कालोपत्र भइसकेको इन्जिनियर खनालले बताए। हालसम्म पूर्वीखण्डको भौतिक प्रगति ५३.१५ प्रतिशत रहेको भन्दै डिसेम्बर महिनामा थप ३.१८ प्रतिशत काम सक्ने गरी निर्माण कम्पनीले काम गरिरहेको इन्जिनियर खनालको भनाइ छ ।
नारायणघाटदेखि बुटवलसम्मको १ सय १४ किलोमिटर सडक विसं २०७९ साउन २२ गतेभित्र काम सक्नेगरी विसं २०७५ माघमा नेपाल सरकार र चीनीया निर्माण कम्पनी चाइना स्टेट कन्स्ट्रक्सन इन्जिनियरिङ कर्पोरेसन लिमिटेडका बीच सम्झौता भएको थियो।
नारायणघाट-दाउन्ने (६५ किलोमिटर) र दाउन्ने-बुटवल (४९ किलोमिटर) गरी दुई खण्डमा ठेक्का लगाइएको योजनाको तत्कालीन प्रधानमन्त्री केपी शर्मा ओलीले २०७५ चैत ८ मा बुटवलमा शिलान्यास गरेको थियो ।
निर्धारित समयमा एक चौथाइ पनि काम नसकेपछि पहिलो पटक २०८० साउन ८, दोस्रो पटक २०८१ साउन ८ सम्मका लागि म्याद थप गरिएको थियो ।
प्रकाशित मिति: मंगलबार, मंसिर २५, २०८१ २०:०२
