त्रिशूली, नुवाकोट । माघे संक्रान्ति पर्वको अवसरमा यसवर्ष बेत्रावतीमा एघार हल गोरु जुधाइने भएको छ।
नुवाकोट र रसुवाको संगमस्थल बेत्रावतीमा गोरु जुधाउन किसानले पालेका मध्येबाट उत्कृष्ट एघार हल गोरु दर्ता गरेर गोरु जुधाउन तयारी गरिएको आयोजक गोसाईकुण्ड युवा क्लबले बेत्रावतीमा जानकारी दिएको हो ।
नेपाल र भोटबीच भएको युद्ध अन्तर्गत विसं. १८४९ मा बेत्रगंगाको नदी किनारमा भएको व्यापारिक सन्धिपछि नेपाली पक्षको जीत भएको उत्सवमा तत्कालीन समयमा ‘गोरु जुधाएको थियो’ भन्ने स्मरणमा थालिएको गोरु जुधाई परम्परालाई निरन्तरता दिन यस वर्षको लागि आवश्यक तयारी पूरा भएको गोरु जुधाई प्रदर्शनी कार्यक्रमका संयोजक सुरज लवटले जानकारी दिए ।
उनको अनुसार गोरु जुधाई प्रदर्शनीको लागि छनोट भएका गोरुको समूह विभाजन, गोरु जुधाईको नियम र आचारसंहिता, जुध्ने गोरुका धनीलाई दिइने पुरस्कार, चोट पटक तथा कुनै भवितव्य भएमा उपलब्ध गराइने क्षतिपूर्ति सहितको व्यवस्थापनका काम पूरा गरिएको छ।
दर्ता भएका गोरुलाई एक-अर्का अर्थात ‘वान भर्सेस वान’का आधारमा जुधाउन ठूलो शरीर भएका गोरु सात हल र साना शरीर भएका गोरु चार हल रहेकाले सोही अनुसार दुई समूहमा विभाजन गरिएको छ । जुधाईका क्रममा ठूला गोरु समूहका विजेता गोरुका धनी किसानले १५ हजार र उपविजेता हुने गोरुका धनीले १३ हजार पाउने छन् ।
यस्तै, साना गोरु समूहबाट विजेता भएका गोरुका धनी किसानले १३ हजार र उपविजेता भएका गोरुका धनी किसानले ११ हजार पुरस्कार पाउने गोरु जुधाई प्रदर्शनी कार्यक्रमका प्रचारप्रसार समितिका संयोजक गणेश श्रेष्ठले जानकारी दिए । उनका अनुसार गोरु जुधाईका क्रममा बराबरी भएमा समान १४ हजार गोरुका धनी किसानले पाउने व्यवस्था गरिएको छ ।
गोरु जुधाई प्रदर्शनीलाई धार्मिक, साँस्कृतिक एवम् कुटनीतिक महत्वको रुपमा बेत्रावती सहित नुवाकोटको तारुका लगायतका स्थान मनाइने गरिएको छ। अनयोजक समितिले गोरु जुधाईलाई विभिन्न ईतिहाससँग जोडेर मनाउँदै आए पनि यसको एकीन तथ्य भने अन्यौल नै रहेको पाइन्छ।
गोरु जुधाई प्रदर्शनी मार्फत पर्यटन प्रबद्र्धनमा सहयोग पुर्याउन स्थानीय सरकार सहित पर्यटन बोर्डबाट समेत आर्थिक सहयोग प्राप्त भएसँगै प्रदर्शनीलाई मेलाको रुपमा सञ्चालनमा ल्याउन थालिएको छ ।
सोही कारण माघे संक्रान्ति पर्वका दिन घ्यू चाकु, एवम् तरुल पिँडालु खाने परम्परासँगै नुवाकोटमा भने विभिन्न स्थानमा गोरु जुधाई प्रदर्शनीलाई निरन्तरता दिइने गरिएको छ ।
विदेशमा सञ्चालन हुने साहसिक खेल ‘बुल फाइट’को झल्को दिँदै नुवाकोटको गाउँघरका किसानले पालेका गोरु जुधाई भिडन्तबाट पाइने मनोरञ्जनले आन्तरिक तथा बाह्य पर्यटनलाई आकर्षित गर्दै आर्थिक गतिविधि बृद्धिमा टेवा पुग्दै आएको छ।
प्रकाशित मिति: बिहीबार, पुस २५, २०८१ २१:२३
