चितवन । व्यावसायिक किट विकास फार्म भण्डाराले औषधीय गुण भएको गानोडर्मा (रातो च्याउ) को व्यावसायिक उत्पादन सुरु गरेको छ।
औषधीय गुण भएको गानोडर्मा (रातो च्याउ) को उत्पादन फार्मले पहिलो पटक थालेको हो ।
बिउ राखेको ६० दिनपछि उत्पादन दिन सक्ने यो च्याउ, फार्मको च्याउ खेती प्रविधि प्रदर्शनी कार्यक्रम अन्तर्गत उत्पादनमा ल्याइएको हो।
कार्यालयका सूचना अधिकारी जीवन सापकोटाका अनुसार, हाल ६ सय वटा पोकामा परीक्षण उत्पादन भइरहेको छ।
काठमाडौँबाट ल्याइएको बिउलाई काठको धुलो, चोक्कर, चुन र जिप्सनको मिश्रणमा तयार पारिएको पोकामा राखेर यसको परीक्षण गरिएको हो।
गानोडर्मा च्याउमा उच्च रक्तचाप नियन्त्रण गर्ने, मधुमेहमा सहायता पुर्याउने, क्यान्सर प्रतिरोध गर्ने, रोग प्रतिरोधात्मक क्षमता बढाउने, डिप्रेसन र अनिद्रामा सुधार ल्याउने औषधीय गुण रहेको बताइएको छ ।
तर, दूध खुवाउँदै गरेकी आमा, पाँच वर्षमुनिका बालबालिका, र शल्यक्रिया पछिका बिरामीहरूलाई यसको सेवन नगर्न सुझाव दिइएको छ।
नेपालमा अहिले यो च्याउ विदेशबाट आयात भइरहेको छ । तर, अब स्वदेशमै पनि यसको व्यावसायिक उत्पादन सुरु भएको छ। काठमाडौँ लगायत देशका केही स्थानमा समेत यो च्याउ उत्पादन हुँदै आएकोे छ ।
च्याउ उमार्नका लागि अधिकतम तापक्रम ३० देखि ३२ डिग्री सेल्सियस, आद्र्रता ८० देखि ८५ प्रतिशत, पर्याप्त प्रकाश र भेन्टिलेसन आवश्यक पर्छ। तयार भएको च्याउलाई पानीमा पखालेर ५० डिग्री सेल्सियस तापक्रममा सुकाउनु पर्छ।
तापक्रम र आद्र्रता मिलाएर सुकाइएपछि गानोडर्मा च्याउलाई पिसेर पाउडरको रूपमा प्रयोग गर्ने गरिन्छ । प्रयोगकर्ताहरूले बिहान वा दिउँसो चिया-कफी जसरी सेवन गर्ने गर्दछन ।
नसर्ने रोग भएका व्यक्तिहरूका लागि भने यो च्याउ विशेष उपयोगी मानिएको छ ।
प्रकाशित मिति: बिहीबार, असार १९, २०८२ ०९:४७
