ललितपुर । ललितपुर महानगरपालिकाले आर्थिक वर्ष २०७८/०७९ का लागि ५ अर्ब ५५ करोड ५५ लाखकोे बजेट पारित गरेको छ।
महानगरपालिकाको सम्पन्न छैठौ नगरसभाले सो बजेट पारित गरेको महानगरपालिकाका प्रमुख चिरीबाबु महर्जनले जानकारी दिएको हो।
महानगरपालिकाका प्रमुख महर्जनका अनुसार विनियोजित बजेटमध्ये चालू खर्चतर्फ ९१ करोड ६१ लाख ५७ हजार र पूँजीगत खर्चतर्फ ३ अर्ब २४ करोड ३० लाख छुट्याएको छ ।
पूर्वाधार र मूर्त तथा अमूर्त सम्पदा संरक्षणलाई प्राथमिकतामा राखेको प्रमुख महर्जनले बताएका छन्। “पूर्वाधार निर्माणसँगै मूर्त तथा अमूर्त सम्पदा संरक्षणलाई प्राथमिकतामा राखेका छौँ”, उनले भने, “विकास सूचकांकको आधारमा महानगरपालिकाले वडालाई ३ भागमा वर्गीकरण गरेर बजेट विनियोजन गरेको छ।”
महानगरपालिकाले वडालाई ३ भागमा वर्गीकरण गरेर बजेट विनियोजन गरेको छ । १३ वटा वडालाई सबैभन्दा बढी ३ करोड २५ लाख, ८ वटा वडालाई २ करोड ५० लाख र ७ वटा वडालाई २ करोड १५ लाख बजेट विनियोजन गरिएको छ।
महानगरपालिकाका प्रमुख महर्जनका अनुसार वडा नं १२, १६, १८, २०, २१, २२, २३, २४, २५, २६, २७, २८ र २९ मा ३ करोड २५ लाख, बडा नं २, ३, ४, ५, ९, १३, १५ र १७ मा २ करोड ५० लाख तथा वडा नं १, ६, ७, ८, १०, ११ र १९ मा २ करोड १५ लाखका दरले बजेट विनियोजन भएको छ।
महानगरपालिका बनाउने क्रममा गाभिएका वडामा धेरै काम गर्न बाँकी रहेकाले बढी बजेट विनियोजन गरिएको प्रमुख महर्जनले बताए।
यसैगरी महानगपालिकाले महानगरीय योजनाअन्तर्गत वडा नं ११ मा विद्युतीय शवदाह गृह निर्माणका लागि १ करोड बजेट विनियोजन गरिएको छ। शवदाह गृह सञ्चालनका लागि शवदाह यन्त्र सहयोगस्वरुप प्राप्त गर्ने पनि उनले जानकारी दिए।
महानगरपालिकाले लगनखेलस्थित सप्तपातल र राजदलगण परिसरमा रहेको पोखरी निर्माणका लागि ५ करोड बजेट छुट्याएको छ।
वडा नं २१ मा रुद्रायणी र वडा नं १३ मा पञ्चेश्वर महादेव मन्दिर पुनर्निर्माण, वडा नं २४ मा आयुर्वेदिक अस्पताल र वडा नं २७ स्थित कृष्ण मन्दिर पुनर्निर्माणसमेत यस आवमा शुरु गरिने महानगरपालिकाको योजना छ।
महानगरपालिकाले चक्रपथमा स्मार्ट सडकबत्ती जडानका लागि ७ करोड र कोभिड विशेष कार्यक्रमका लागि ५ करोड छुट्याएको प्रमुख महर्जनले जानकारी दिए।
