कुनैबेला स्कूल लाइफको फलामे ढोका भनिने गरेको एसएलसी.परीक्षाको जति महत्व र आकर्षण थियो । केही बर्षयता एसएलसी माध्यामिक शिक्षा परीक्षा (एसईई) भएपछि यसको महत्व र आकर्षणमा गिरावट आएको छ । पहिला एसएलसी परीक्षा पास गर्नु भनेको फलामे चिउरा चपाउनु जत्तिकै गाह्रो हुने भएको कारण यसलाई फलामे ढोका पनि भनिएको हो ।
हाल एसईई परीक्षामा फेल भन्ने कुरै नहुने र जसरी परीक्षा दिँदा पनि हुने भन्ने मानसिकताले यसको महत्व र आकर्षणमा गिरावट ल्याएको छ । त्यसमाथि, प्रतिशतमा भन्दा ग्रेडिङले यसको आकर्षणमा गिरावट ल्याएको हो । धेरैले नबुझिने गरेको ग्रेडिङ सिष्टमको नतिजा खासै रुचाएको पनि देखिएको छैन् । यद्यपि, इन्टरनेशनल शिक्षा नीति नेपालले पनि अंगालेको कारण यसलाई आत्मसात गर्नु वाध्यता पनि हो ।
अर्कोतर्फ माध्यामिक शिक्षा परीक्षा (एसईई) नतिजा गत हप्ताको बुधबार सार्वजनिक भएको छ । यस वर्षको नतिजा सन्तोषजनक भने देखिएन । शैक्षिकसत्र २०७५ को तुलनामा यो पटकको नतिजा खस्किएको छ । २०७६/०७७ मा भने राष्ट्रिय परीक्षा बोर्डले आन्तरिक मूल्यांकनका आधारमा विद्यार्थीको नतिजा प्रमाणित गरेको थियो ।
शैक्षिकसत्र २०७५ मा परीक्षा दिएका मध्ये ३.८३ प्रतिशतले उच्च जीपीए (३.६देखि ४.०) ल्याएका थिए । यो पटक भने परीक्षा दिएका कूल विद्यार्थीमध्ये १.९४ प्रतिशतले ३.६ देखि ४.० जीपीए ल्याएका छन् । राष्ट्रिय परीक्षा बोर्डका अनुसार ९ हजार ६ सय ३३ जनाले उच्च जीपीए ल्याएका हुन् । यसरी हेर्दा नतिजा १.८८ प्रतिशतले खस्किएको छ ।
यस्तै शैक्षिकसत्र २०७५मा परीक्षा दिएका मध्ये ११.१३ प्रतिशतले ३.२ देखि ३.६ जीपीए ल्याएका थिए । यो पटक भने परीक्षा दिएका कुल विद्यार्थी मध्ये ८.४० प्रतिशतले ३.२ देखि ३.६ जीपीए ल्याएका छन् । यसरी हेर्दा शैक्षिकसत्र २०७५ को तुलनामा यो वर्ष ३.२ देखि ३.६ जीपीए ल्याउने परीक्षार्र्थीको संख्या २.७४ प्रतिशतले घटेको छ ।
यसरी गिरावट आउनुमा परीक्षा प्रणालीको दोष या परीक्षा दिने विद्यार्थीहरुमा आएको मानसिकता परिवर्तनमा आएको हो या अध्ययन–अध्यापनकै गल्ती हो ? यसमा विचार पुर्याउन आवश्यक छ ।
अनि याे पनि :
प्रकाशित मिति: शनिबार, साउन २१, २०७९ १०:५६
