काठमाडौँ । करण केसीको उत्कृष्ट बलिङमा नेपालले त्रिकोणात्मक अन्तर्राष्ट्रिय ट्वान्टी-२० शृङ्खलाअन्तर्गत भएको खेलमा नामिबियालाई ३ रनले पराजित गरेको छ।
जितका लागि १ सय ८१ रनको चुनौती पछ्याएको नामिबिया निर्धारित २० ओभरमा ७ विकेट गुमाउँदै १ सय ७७ रनमा समेटेको हो।
नामिबियालाई अन्तिम ओभरमा जितका लागि १२ रन आवश्यक रहेकामा नेपालका करण केसीले उत्कृष्ट बलिङ गर्दै नामिबियालाई ८ रन मात्रै दिएका थिए।
योसँगै अन्ततः नेपालको जित सुनिश्चित भएको हो। यो जितसँगै २ अङ्क जोडेको नेपालले फाइनल खेल्ने सम्भावना प्रबल बनाएको छ। नामिबियाको यो हारपछि पनि अङ्तालिकामा भने समान २ अङ्क नै छ।
नेदरल्यान्डसको २ खेलमा ४ अङक रहेको छ। नेपाल पहिलो खेलमा नामिबियासँग २० रनले पराजित भएको थियो भने नेदरल्यान्ड्ससँग २ विकेटले पराजित भएको थियो। त्यस्तै नामिबिया हिजो भएको खेलमा नेदरल्यान्ड्ससँग ५९ रनले पराजित भएको थियो।
आजको खेलमा नामिबियाका लागि कप्तान जेजे स्मिथले अर्धशतक प्रहार गरेका थिए। उनले २६ बलमा ६ चौका र २ छक्का प्रहार गर्दै ५० रन जोडेका हुन्।
त्यस्तै जान फ्रिलिङ्कले ३७ रन जोडे भने जेपी कोट्जेले २५ र माइकल भने लिङ्गेनले १० रन बनाए। रुबेन ट्रम्पलम्यानले १४ रन जोड्दा जेन ग्रिनले अविजित २३ रन बनाएका थिए।
बलिङतर्फ नेपालका करण केसी, सोमपाल कामी र कप्तान रोहित कुमार पौडेलले समान २/२ विकेट लिए भने अभिनाश बोहोराले १ विकेट लिएका थिए।
त्यसअघि कीर्तिपुरस्थित त्रिवि मैदानमा टस हारेर पहिला ब्याटिङको निम्तो पाएको नेपालले निर्धारित २० ओभरमा ८ विकेट गुमाउँदै १ सय ८० रनको योगफल बनाएको थियो।
नेपालका लागि कुशल मल्लले अर्धशतक प्रहार गर्दै उनले ३७ बल खेल्दै १ चौका र ४ छक्काको मद्दतमा ५५ रन बनाएका हुन्। कुशलले आरिफ शेखसँग पाँचौ विकेटका लागि ८५ रनको साझेदारी गरेका थिए भने आरिफले आउट हुनुअघि २४ बलमा ४ चौकाको सहायताले ३१ रन जोडेको थिए।
त्यस्तै गुलशन झाले १६ बल खेल्दै १ चौका र ३ छक्काको ससहायताले २६ रन बनाए भने अनिल शाहले १७ बलमा ३ छक्काको मद्दतमा २३ रन जोडेका थिए।
त्यस्तै दीपेन्द्र सिंह ऐरी ८ बलमा २ चौका प्रहार गर्दै १६ रनमा आउट भए। कप्तान पौडेल ९ बलमा २ चौका प्रहार गर्दै १० रनमा आउट भएका थिए।
त्यस्तै सुरुवाती ब्याट्सम्यान आसिफ शेख १ रनमा आउट हुँदा करण केसीले ७ र सोमपाल कामी २ रनमा आउट भएका थिए।
बलिङतर्फ नामिबियाका बेन शिकाङ्गोलले तीन विकेट लिए भने ज्याक ब्रेसलले २ विकेट झारेका थिए। त्यसैगरी बर्नार्ड स्कोल्ज र जान निकोल लोफटी इटनले समान १/१ विकेट लिए।
अब नेपालले भोलि नेदरल्यान्डसँग खल्नेछ।
प्रकाशित मिति: शुक्रबार, फागुन १८, २०८० १५:४८
