काठमाडौं । नेपालको इतिहासमै पहिलो पटक खेलकुद प्रदर्शनी हुने भएको छ ।
नेपाल ओलम्पिक संग्रहालय (एनओएम) ले पहिलो पटक खेलकुदसम्बन्धी प्रदर्शनीको आयोजना गर्न लागेको हो ।
‘बियोन्ड मेडल्स: प्रिजर्भिङ नेपाल्स स्पोर्ट्स हिस्ट्री’ शीर्षकको प्रदर्शनी यहि साउन १९ देखि २१ गते (अगस्ट ४–६) सम्म बबरमहलस्थित नेपाल आर्ट काउन्सिलमा सञ्चालन हुने आयोजकले जनाएको छ।
यसरी तीन दिनसम्म चल्ने प्रदर्शनीमा करिब पाँच लाख दुर्लभ तथा ऐतिहासिक तस्बिरबाट छनोट गरिएको विभिन्न कालखण्डका पदक, ट्रफी, खेल सामग्री र खेलकुदसँग सम्बन्धित ऐतिहासिक स्मृतिचिन्हसहित प्रदर्शनीमा राखिनेछ।
प्रदर्शनीमा राष्ट्रिय तथा अन्तर्राष्ट्रिय खेलाडी, प्रशिक्षक, खेल प्रशासक र खेलप्रेमीको सहभागिता रहने अपेक्षा गरिएको जनाइएको छ।
खेलकुदक्षेत्रमा नेपालको गौरवपूर्ण इतिहासलाई विश्वसामू चिनाउन यस प्रदर्शनीको महत्वपूर्ण भूमिका रहनुको साथै प्रचारप्रसारलाई अझ तीब्रता दिनु आजको आवश्यकता रहेको समेत आयोजकको भनाई छ।
प्रकाशित मिति: सोमबार, साउन १८, २०८३ ०७:५१
