काठमाडौ । विवाहित महिलाहरुको प्रतिष्ठित सौन्दर्य प्रतियोगिता मिसेस नेपाल वर्ल्ड-२०२५ का लागि आगामी साउन ३१ गते अडिसन हुने भएको छ ।
अडिसन नयाँ बानेश्वरस्थित अर्याल इन्टरनेसनल होटलमा हुने अडिशनमा सहभागी हुन इच्छुक व्यक्तिहरुले खल्ती एपमार्फत, रिबन इन्टरटेनमेन्टको वेबसाईट वा आयोजकको शंखमूलस्थित कार्यालय प्रत्यक्ष गएर आवेदन दिन सक्नेछन्।
अडिसनबाट छनोट भएका प्रतिस्पर्धीलाई कोरियोग्राफर अश्विनी झाले प्रशिक्षण दिनेछन् भने विभिन्न विषयका विशेसज्ञहरुले नियमित तालिम दिनेछन् ।
गंगा महर्जन र सम्राट शाहको संयोजनमा प्रशिक्षण सत्र आगामी भदौ १८ गतेदेखि सुरु हुने यस वर्षको ग्रान्ड फिनाले असोज २८ गते कमलादीस्थित नेपाल प्रज्ञा प्रतिष्ठानमा हुनेछ । सोही अवसरमा मिसेस नेपाल इन्टरनेसनल र एमएस इन्टरनेसनल उपाधि विजेताहरू पनि घोषणा गरिने छ ।
यस वर्ष पनि मिसेस नेपाल वर्ल्ड विजेताले अमेरिकाको लस भेगासमा हुने मिसेस नेपाल वर्ल्डमा नेपालको प्रतिनिधित्व गर्ने अवसर पाउनुको साथै मिसेस नेपाल इन्टरनेसनल र एमएस इन्टरनेसनलको उपाधि विजेताले सिंगापुरमा हुने मिसेस इन्टरनेसनलमा सहभागी हुन पाउने आयोजक रिबन इन्टरटेनमेन्ट प्रालिका अध्यक्ष निशुकान्त झाले बताए ।
मिसेस वर्ल्ड-२०२२ मा नेपालको तर्फबाट दिक्षा केसीले सहभागिता जनाएकी थिइन् भने मिसेस वर्ल्ड-२०२३ मा पृथ्वीया थापाले सहभागीता जनाएर मिसेस ह्युमनिटरियन उप-उपाधि अवार्ड प्राप्त गर्न सफल भएकी थिईन।
यस बर्ष डेनिला कार्कीले मिसेस वर्ल्ड-२०२५ मा प्रतिनिधित्व जनाउने छिन् । साथै, विगतका वर्षजस्तै यस वर्ष पनि नेपाली चलचित्र क्षेत्रमा सक्रिय एक ख्यातिप्राप्त अभिनेत्रीलाई मानार्थ मिसेस नेपाल उपाधिबाट सम्मान गरिने आयोजकले जनाएका छन्।
प्रकाशित मिति: मंगलबार, साउन २७, २०८२ ११:३९
