झापा । “तयार होऔँ” भन्ने उद्देश्य बोकेर हिँडेको स्काउटले व्यावहारिक रूपमा विद्यार्थीहरूलाई विभिन्न सिपहरू प्रदान गर्दै आइरहेको छ। झापाको शिवसताक्षी नगरपालिकामा २० वटा विद्यालयमा स्काउट कक्षा सञ्चालनमा रहेका छन्। यसै सन्दर्भमा स्काउट मास्टरहरूको क्षमता विकास तथा अभिवृद्धिका लागि रिफ्रेसमेन्ट तालिम मिति २०८३ वैशाख १८ र १९ गते पर्यटकीय स्थल श्रीअन्तुमा सञ्चालन भएको थियो। जसमा २८ जना स्काउट मास्टरहरूको सहभागिता रहेको थियो।
१२ जना महिला शिक्षक र १६ जना पुरुष शिक्षकको सहभागिता रहेको उक्त कार्यक्रममा पहिलो सत्रको प्रारम्भिक कार्यक्रम सञ्चालन नगर स्काउट परिषद् सदस्य सन्तोष खत्री सरबाट भएको थियो भने प्रारम्भिक चरणको कार्यक्रमको अध्यक्षता ज्येष्ठताको आधारमा स्काउट मास्टर केदार खनाल सरबाट भएको थियो। प्रमुख अतिथि सूर्योदय नगरपालिका स्थानीय स्काउट आयुक्त सुवास राईज्यू हुनुहुन्थ्यो भने दोस्रो सत्रको कार्यक्रम भक्ति काफ्लेद्वारा सञ्चालन भएको थियो।
१८ गतेको प्रशिक्षण कार्यक्रम स्काउटिङ गतिविधिहरू विषयमा अतिथि प्रशिक्षक श्री सुवास राईद्वारा गरिएको थियो भने नटिङको सिप नरेन्द्र सुवेदी र दुर्गा उप्रेती सरद्वारा सिकाइएको थियो। जसमा खुल्ला किल्ला पासो, बन्दकिल्ला पासो, डाक्टरी गाँठो, सन्धि गाँठोजस्ता डोरीको प्रयोग मानवीय हरेक क्रियाकलापमा आवश्यक पर्ने भएकाले डोरीको गाँठो सम्बन्धी प्रयोगात्मक अभ्यास रोचक ढङ्गले सबैजनाको सक्रिय सहभागितामा व्यावहारिक रूपमा प्रयोग गर्न सक्ने गरी सिकाइएको थियो।
दोस्रो दिन बिहानको सुरुवात हामीले श्रीअन्तुको भौगोलिक तथा प्राकृतिक दृश्य अवलोकनबाट गरेका थियौँ। जसमा हामीलाई प्रशिक्षक आदरणीय व्यक्तित्व सुवास राईले सहजीकरण गर्नुभएको थियो। उहाँले नेपाल–भारत सिमाना अवलोकन गराउनुभएको थियो। जहाँ मेची नदी नेपालको र भारतको सिमानामा रहेको कुराको दृश्यावलोकन गरियो। नेपाल–भारतको भौगोलिक अवस्था उस्तै तर विकास फरक देखिरहँदा नेपाल कहिले विकसित देशको सूचीमा पर्छ ? यहाँका यस्ता राम्रा भौगोलिक तथा प्राकृतिक स्रोतहरूको प्रयोग दिगो विकासका लागि कहिले हुन्छ ? भन्ने अपेक्षा र चाहना सबैको रहेको थियो।
कार्यक्रमको औपचारिक सत्र सञ्चालन शारदा बजगाईद्वारा गरिएको थियो भने सभाध्यक्षता कार्यक्रमका संयोजक तथा शिवसताक्षी नगर परिषद् सदस्य सन्तोष खत्रीले गर्नुभएको थियो। यसैगरी प्रमुख अतिथि सूर्योदय नगरपालिका वडा नम्बर ५ का वडा अध्यक्ष ओर्गेन तामाङ तथा विशिष्ट अतिथि सूर्योदय स्थानीय स्काउट आयुक्त सुवास राई रहनुभएको थियो भने उपस्थित अतिथिगणलाई स्काउट नगर परिषद् सदस्य मीना कार्कीद्वारा स्वागत मन्तव्य व्यक्त गरिएको थियो। कार्यक्रममा स्काउट क्रियाकलापअन्तर्गत शारीरिक, बौद्धिक, भावनात्मक, सामाजिक र आध्यात्मिक क्रियाकलापका बारेमा प्रशिक्षकद्वारा स्पष्ट पारिएको थियो।
कार्यक्रमका सबल पक्ष, सुधार गर्नुपर्ने पक्ष तथा कार्यक्रम अवधिका व्यवस्थापकीय पक्षका बारेमा स्काउट मास्टर दीपा राईले आफ्ना विचार प्रस्तुत गर्नुभएको थियो। यसैगरी दुईदिने कार्यक्रमको प्रतिवेदन स्काउट मास्टर नारद दवाडीद्वारा प्रस्तुत गरिएको थियो। स्काउटहरू प्रकृतिप्रेमी हुने भएकाले फर्किने क्रममा करसाङ पदमार्गमा पदयात्रा गरिएको थियो। जाने क्रममा इलामका धार्मिक स्थलहरूको दर्शनसमेत गरिएको थियो।
प्रकाशित मिति: शनिबार, वैशाख २६, २०८३ ०७:००
