प्रदेश नं १ सरकारले कोरोना रोकथाम, नियन्त्रण र उपचारको व्यवस्था मिलाउनका लागि स्थानीय पालिकालाई थप १ करोड १० लाख उपलब्ध गराएको छ।
प्रदेश सरकारले स्थापना गरेको कोरोना जनसुरक्षा कोषबाट आइसोलेशन केन्द्र स्थापना तथा सञ्चालनका लागि स्थानीय पालिका, जिल्ला अस्पताल, प्रशासन लगायतलाई आवश्यक रकम पठाइएको हो ।
मोरङ्गका सुनवर्षी र रतुवामाई नगरपालिकालाई १०÷१० लाख तथा धनपालथान, जहदा र कटहरी गाउँपालिकालाई ५ ५ लाखका दरले आइसोलेशन केन्द्र स्थापना र सञ्चालनका लागि रकम पठाइएको छ।
त्यस्तै चौदण्डीगढी नगरपालिकालाई १० लाख तथा गौरीगञ्ज र कमल गाउँपालिकालाई ५५ लाख प्रदेश सरकारले पठाएको छ।
यसैगरी इलाम अस्पताललाई १० लाख, उदयपुर अस्पताललाई १५ लाख र झुम्का कारागारलाई रु १० लाख पठाइएको छ।
सुनसरी जिल्लाका क्वारेन्टिन, आइसोलेशन र होल्डिङ सेन्टर व्यवस्थापनका लागि जिल्ला प्रशासन कार्यालय सुनसरीलाई १० लाख र प्रदेश प्रहरी कार्यालय परिसरभित्रको आइसोलेशन व्यवस्थापनका लागि प्रदेश प्रहरी कार्यालयलाई १० लाख प्रदेश सरकारले कोरोना जनसुरक्षा कोषबाट उपलब्ध गराएको हो ।
स्थानीय पालिकाको आवश्यकता र मागबमोजिम प्रदेश सरकारले आवश्यक रकम उपलब्ध गराउँदै आएको मुख्यमन्त्री शेरधन राईले बताए।
कोभिड महामारी पराजित गर्न तीनै तहका सरकारबीच आवश्यक समन्वय र सहकार्य रहेको मुख्यमन्त्री राईको भनाइ छ।
प्रकाशित मिति: बिहीबार, भदौ २५, २०७७ २२:५९
