काठमाडौ । पछिल्लो दस महिनाको अवधिमा झण्डै ५ लाख विदेशी पर्यटक नेपाल भित्रिएका छन् ।
नेपाल पर्यटन बोर्डले उपलब्ध गराएको तथ्याङ्कअनुसार अङ्ग्रेजी वर्षको जनवरीदेखि अक्टोबरसम्म ४ लाख ७३ हजार ५ सय ६३ पर्यटकले नेपाल भ्रमण गरेको हो।
अक्टोबरमा मात्रै ८८ हजार ५ सय ८२ पर्यटक नेपाल आएका छन् । पर्यटक आगमन दर यो वर्षको हालसम्मकै बढी सङ्ख्या हो ।
यसअघि अप्रिलमा सबैभन्दा बढी ६१ हजार ५ सय ८९ पर्यटक नेपाल भित्रिएका थिए । सेप्टेम्बरमा ५८ हजार ३ सय १४, अगष्टमा ४१ हजार ३ सय ४, जुलाईमा ४४ हजार ४ सय ६२ र जुनमा ४६ हजार ९ सय ७५ पर्यटक नेपाल आएका थिए ।
त्यसैगरी, मेमा ५३ हजार ६ सय ८, मार्चमा ४२ हजार ६, फेब्रुअरीमा १९ हजार ७ सय ६६ र जनवरीमा १६ हजार ९ सय ७५ पर्यटकले नेपाल भ्रमण गरेका थिए ।
कोभिड–१९ महामारीका कारण घटेको विदेशी पर्यटकको सङ्ख्या सन् २०२२ मा भने बढ्दो क्रममा रहेको तथ्याङ्कले देखाउँछ ।
महामारीपूर्व सन् २०१९ मा ११ लाख ९७ हजार ९१ जना पर्यटक नेपाल आएका थिए । तर सन् २०२० मा कोरोना महामारीका कारण विदेशी पर्यटकको सङ्ख्या ८१ प्रतिशतले कमी आइ २ लाख ३० हजार ८५ जना पर्यटक नेपाल भित्रिएका थिए ।
त्यसैगरी २०२१ मा भने १ लाख ५० हजार ९ सय ६२ पर्यटक नेपाल आएका थिए । जुन सन् २०२० को तुलनामा ३४ दशमलव ४ प्रतिशतले कमी हो ।
पयर्टन बोर्डका निर्देशक मणिराज लामिछानेले सन् २०१९ मा आएका कूल पर्यटकको सङ्ख्यामा ७० देखि ७५ प्रतिशतसम्म ‘रिकभर’ हुने अपेक्षा गरिएको र सोअनुसार पर्यटक आगमन भइरहेको बताए ।
बोर्डका निर्देशक लामिछानेले यही दरमा पर्यटक भित्रिए यो वर्ष ६ लाखभन्दा बढी पर्यटक नेपाल भित्रिने बताउँछन् ।
प्रकाशित मिति: शुक्रबार, कात्तिक १८, २०७९ १८:२५
