काठमाडौं। यो बर्षको मिसेस नेवाः वर्ल्ड् सुमिना महर्जन बन्न सफल भएकी छन्।
काराओके इन्टरमेन्टको आयोजनामा पहिलो पल्ट भएको मिसेस नेवाः वर्ल्ड्मा नेपाःडान्स एकेडेमीकी डान्स डाइरेक्टर सुमिना महर्जन बेस्ट हेयर टाइटल समेत जितेर मिसेस नेवाः वर्ल्ड् बन्न सफल भएकी हुन्।
१७ जना विवाहिता नेवाः महिलाहरुवीच भएको प्रतिस्पर्धात्मक मिसेस नेवाः वर्ल्ड्मा फस्ट रनरअप लायन्स क्लव अफ काठमाडौं फेलोसिपकी पूर्व प्रेसिडेन्ट तथा एलआइसिएन सविना महर्जन बनेकी छन्।
एलआइसिएन महर्जनले बेस्ट स्किन टाइटल अवार्ड पनि जितेकी थिइन्। त्यस्तै, सेकेण्ड रनरअप ग्रीष्मा रञ्जितकार भइन्। साथमा उनले बेस्ट ड्रेसको टाइटल अवार्ड जितेकी थिइन्।
मिसेस नेवाः वर्ल्ड्मा रियालिटी शो को तरिकाले बिभिन्न प्राङ्गणमा आ–आफ्नो प्रतिभालाई दर्शकमाझ प्रतियोगीहरुले प्रस्फुटन गरेका थिए।
हरिसिद्धी नेवाःसुलि,काराओके इन्टरटेन्मेन्ट्को मुख्यालय अनि काठमाडौं हनुमानढोकामा सार्वजनिक छनौट हुदै फाइनल राष्ट्रिय नाचघरमा संपन्न भएको जानकारी आयोजक समितिका अध्यक्ष खगेश रञ्जितकारले दिएका छन्।
स्काई ग्रुप अफ कम्पनीका प्रमुख राजन कुमार श्रेष्ठ, पूर्व प्रहरी अफिसर दीपक रञ्जित, पूर्वकुमारी मिस नेशनल समिता बज्राचार्यको विशेष आतिथ्यता रहेको कार्यक्रमको सञ्चालन कोरियोग्राफर एवम् सञ्चारकर्मी रोजिन शाक्यवाट भएको थियो।
प्रकाशित मिति: शनिबार, मंसिर १६, २०८० १०:४४
