म्याग्दी । म्याग्दीको अन्नपूर्ण गाउँपालिका-७ दोसल्लेकी मायादेवी पुनको बगैचामा रहेका ९० वटा बोटका सुन्तला बोटबाटै बिक्री भइसकेका छन्।
मुस्ताङका व्यवसायीले ५ लाखमा अग्रिम पेश्की बुझाएर बगैँचा नै ठेक्कामा लिएका हुन्। मायादेवी दोसल्लेमा सबैभन्दा धेरै सुन्तला फलाउने कृषक हुन्।
कोदो, मकै र धान खेती हुने खेतमा लगाएको सुन्तलाले उत्पादन दिन थालेपछि घरव्यवहार चलाउन र छोराछोरी पढाउन सजिलो भएको कृषक, अन्नपूर्ण गाउँपालिका-७ म्याग्दीका कृषक मायादेवी पुनले बताए।
पुनसँगै दोसल्लेका सबै कृषकले सुन्तला नटिप्दै बोटबाटै बिक्री गरेका छन्। ४२ घरधुरी कृषकले ९ हजार बोटमा सुन्तला फलाएका दोसल्ले सुन्तला उत्पादन कृषक समूहका अध्यक्ष प्रेम पाईजाले बताए।
रंग र गुलियो पसेपछि सुन्तला टिपेर बजार पठाउने गर्छन्। समूहले व्यापारीसँग समन्वय गरेर सुन्तलाको बजार व्यवस्थापन गरेको हो। मुस्ताङ र काठमाडौका साथै स्थानीय तीन जना व्यापारीले पुरै गाउँको सुन्तला खरिद गरेका हुन्।
फुल खेल्ने र दाना लाग्ने समयमा असिना, पानी परेको र औसा किराको प्रकोपका कारण यसपाली सुन्तला उत्पादन घटेको कृषकहरुले बताएका छन्।
दोसल्लेकी बासिन्दा समेत रहेकी अन्नपूर्ण गाउँपालिकाका पूर्व उपाध्यक्ष केशमाया मगरले सडक यातायात र बजारको सुविधा सँगै बाँझिएका पाखो बारीमा झाडी फाडेर सुन्तलाका बिरुवा रोप्ने अभियान चलेको बताए।
गाउँपालिका, कृषि ज्ञान केन्द्र, सुन्तला जोन कार्यालयबाट सुन्तला खेती सम्बन्धी तालिम, बगैँचा व्यवस्थापन र रोगकिरा नियन्त्रणमा सहयोग भएको छ। औंसा किराका कारण झरेका दानालाई सुरक्षित रुपमा व्यवस्थापन गर्न प्लास्टिकको थैलो वितरण गरेका छन्।
पश्चिम फर्किएको भिरालो पाखोमा समुन्द्रि सतहदेखि १ हजार ३ सय मिटरको उचाईमा अवस्थित दोसल्लेको भूगोल र हावापानी सुन्तला खेतीका लागि अनुकुल छ।
महभिर हुँदै दोसल्ले जोड्ने सडक स्तरोन्नति र सिचाई आयोजना निर्माण भएमा सहज हुने दोसल्लेका कृषकको अपेक्षा छ।
प्रकाशित मिति: शनिबार, मंसिर ३०, २०८० १९:००
