काठमाडौ । काेराेनाभाइरस (कोभिड-१९) रोकथामका लागि जारी भएको निषेधाज्ञाको समयमा ६८० महिला तथा बालबालिकामाथि हिंसाको घटना भएको छ।
महिला पुनःस्थापना केन्द्र (ओरेक) ले सङ्कलन गरेको घटनाका आधारमा निषेधाज्ञाको समयमा धेरै महिला र बालबालिका पीडित भएको पाइएको हो।
ओरेकले वैशाख १६ देखि असार ३१ गतेसम्म सङ्कलन भएका घटनाका आधार बनाएर अध्ययन गरेको थियो। सो अवधिमा अभिलेखीकरण भएकामध्ये सबैभन्दा बढी ३४१ घटना घरेलु हिंसा रहेको छ। झण्डै ५० प्रतिशत घरेलु हिंसाको घटना भएको तथ्याङ्कले देखाएको छ।
एक सय ६८ शारीरिक हिंसा, ५८ गालीगलौच र मानसिक हिंसा, ३७ वटा चारित्रिक आरोपका घटना छन्। घटना हुनुको कारण विश्लेषण गर्दा महिलाले दाइजो नल्याएको वा कम ल्याएको, छोरा नजन्माएको निहुँ, विवाहको लामो समयसम्म सन्तान नजन्मिएको लगायत विषयमा महिलालाई दोष लगाएर गालीगलौच गरेको पाइएको छ।
हिंसा पीडिक महिलामध्ये २८ जनालाई परिवारमा माया नदिएर बेवास्ता गरिएको, १० जनालाई विवाह दर्ता नभएको, ८ जनालाई नागरिकता नबनाएको र ५ जनालाई स्वास्थ्योपचार नदिएको बताइएको छ।
यस अवधिमा भएका घटनामध्ये २१ प्रतिशत बलात्कार, ९ प्रतिशत सामाजिक हिंसा, १प्रतिशत बलात्कारको प्रयास, ३ प्रतिशत यौन दुव्र्यवहार र २ प्रतिशत हत्याको प्रयास रहेको छ ।
यस अवधिमा ३ आत्महत्याको प्रयास, ५ एसिड आक्रमण, १७ अलपत्र पारिएको र १विद्युतीय अपराधसँग सम्बन्धित घटना रहेको छ। यस अवधिमा भएका घटनाका आधारमा हिंसा गर्नेमा सबैभन्दा धेरै ३११ श्रीमान् रहेका छन्।
एक सय १८ परिवारका अरु सदस्य रहेका छन्। सो तथ्याङ्कका आधारमा घर र परिवारमा सबैभन्दा सुरक्षित हुनुपर्ने भए पनि त्यही महिला र बालिका असुरक्षित भएको पाइएको छ।
प्रकाशित मिति: मंगलबार, साउन ५, २०७८ १९:३९
