झापा । सताक्षीधाम साहित्य संगम को आयोजनामा १६१औँ मोती जयन्ती विविध साहित्यिक कार्यक्रमका साथ भव्य रूपमा सम्पन्न भएको छ। आयोजित कार्यक्रममा साहित्यकार, गजलकार तथा स्रष्टाहरूको उल्लेख्य सहभागिता रहेको थियो ।
सताक्षीधाम साहित्य संगमका अध्यक्ष उमानाथ दाहालको अध्यक्षतामा सम्पन्न कार्यक्रममा प्रसिद्ध गजलकार विवस बलिभद्र कोइराला प्रमुख अतिथिका रूपमा उपस्थित थिए ।
कार्यक्रममा साहित्यकार बिन्दू दाहाल मुकदर्शक, भीम दाहाल, हरि पराजुली, अभागी थेगुवा लगायत साहित्यप्रेमी तथा विभिन्न स्रष्टा तथा गजलकारहरूको सहभागिता रहेको थियो ।
कार्यक्रममा नेपाली साहित्य, विशेषतः गजल, साहित्यिक समालोचना तथा सिर्जनाका क्षेत्रमा उल्लेखनीय योगदान पुर्याएका साहित्यकार मोतीराम भट्टको साहित्यिक योगदानलाई स्मरण तथा सम्मानका साथ चर्चा गरिएको थियो ।
उनले नेपाली साहित्य विकासमा पुर्याएको योगदान, गजल विधाप्रतिको लगाव तथा साहित्यिक चिन्तन र समालोचनात्मक क्षेत्रमा पुर्याएको योगदानलाई सहभागीहरूले स्मरण गरेका थिए ।
मोती जयन्तीका अवसरमा आदिकवि भानुभक्त आचार्यलाई चिनाउन गरिएको प्रयास तथा गजल परम्पराका अग्रणी व्यक्तित्व मोतीराम भट्टको साहित्यिक योगदानलाई समेत स्मरण गर्दै नेपाली गजलको विकासक्रम, वर्तमान अवस्था र साहित्यिक सिर्जनाका विविध पक्षमाथि चर्चा गरिएको थियो।
मोतीराम भट्टले नेपाली साहित्यमा गजल विधाको विकास र विस्तारमा पुर्याएको योगदान नेपाली साहित्यको इतिहासमा विशिष्ट रहेको वक्ताहरूले बताएका थिए ।
कार्यक्रममा ४० भन्दा बढी कवि कवयित्रीहरूको सहभागिता रहेको थियो । हरि पराजुली, अश्विन धिताल, नारदमणि न्यौपाने, अनिल आचार्य, सन्तोष लावती, शारदा बजगाई, लोकमणि गौतम, श्रीप्रसाद खरेल, यादवप्रसाद घिमिरे, नारायण भट्टराई, वीरेन्द्र बस्नेत, क्षितिज मैनाली, तनुजा खतिवडा लगायतले गजल तथा कविता प्रस्तुत गरेको थियो ।
कार्यक्रमको सञ्चालन यादव घिमिरेले गरेको थियो । कार्यक्रमलाई व्यवस्थित बनाउन संस्थाका उपाध्यक्ष तथा कोषाध्यक्ष पदमप्रसाद दाहाल र लोकमणि गौतमले सदस्यहरूको समन्वय तथा सहजीकरण गरेको थियो ।
सताक्षीधाम साहित्य संगमका पदाधिकारी, सदस्य, उपस्थित स्रष्टा तथा गजलकारहरूको सक्रिय सहभागितामा उत्कृष्ट गजल वाचन गर्दै सम्पन्न कार्यक्रमले साहित्यिक सिर्जना, गजल लेखन, समालोचना र स्रष्टाहरूबीचको आत्मीय सम्बन्धलाई थप मजबुत बनाएको आयोजकको भनाइ छ ।
कार्यक्रमले नेपाली साहित्यका अग्रज स्रष्टाहरूको योगदानलाई नयाँ पुस्तासम्म पुर्याउँदै साहित्यिक गतिविधिलाई निरन्तरता दिनुपर्ने सन्देशसमेत दिएको छ ।
नामी साप्ताहिक
