काठमाडौं । आजबाट विधिवत रुपमा हेमविक्रम सिलवाल नेतृत्वको स्वतन्त्र नागरिक समाज नेश्नलिष्ट पिपल्स पार्टीमा समाहित भएको छ।
रिपोर्टर्स क्लब नेपालमा आयोजित एक पत्रकार सम्मेलन गर्दै सिलवाल नेतृत्वको स्वतन्त्र नागरिक समाज नेश्नलिष्ट पिपल्स पार्टीमा समाहित भएको जानकारी दिइएको हो।
उक्त पत्रकार सम्मेलनमा बोल्दै पार्टी केन्द्रीय सदस्य ओम भण्डारीले १४ महिना अघि नेश्नलिष्ट पिपल्स पार्टी दर्ता गरिएको जानकारी दिँदै स्वतन्त्र नागरिक समाजका संयोजक सिलवाललाई पार्टी प्रवेश गरेसँगै पार्टी प्रवक्ताको जिम्मेवारी दिइएको बताएका थिए।
प्रत्यक्ष निर्वाचित प्रधानमन्त्रीको पक्षमा आफ्नो पार्टी भएको दाबी गर्दै केन्द्रीय सदस्य भण्डारीले भने, ‘हाम्रो पार्टी शेरेमेनियल मोनार्कीको पक्षमा छ, जनताको मत लिएर जनमत संग्रहमा लगेर टुंग्याउने छौं। जातियता र क्षेत्रियता उन्मूलन, धर्म र जातीमा भएका समस्यालाई जनमत लिएर जनतामाझ जानेछौ।’
केन्द्रीय सदस्य भण्डारीले आफ्नो पार्टीले इतिहासलाई सम्मान गर्ने दाबी गर्दै संसदीय व्यवस्थाको विरोधी भएपनि विस्तारै परिवर्तन गरेर अघि बढ्ने बताएका थिए । भ्रष्टाचार निर्मुल गर्ने र अन्य पार्टीको विरोध नगर्ने पनि आफ्नो पार्टीको नीति रहेको प्रष्ट पारेका थिए।
पार्टी भर्खरै स्थापना भए पनि केन्द्र, जिल्ला, गाउँ तथा नगर समिति गठन गरिसकेको वताउँदै उनले केन्द्रीय समितिमा ८५, प्रदेश ४५, जिल्ला ३५ र वडा कमिटी १५ जना रहेको तथ्यांक केन्द्रीय सदस्य भण्डारीले प्रस्तुत गरेका थिए।
आयाेजित सम्मेलनमा पार्टी प्रवक्ता हेमविक्रम सिलवालले नेपालको नागरिक समाजको आन्दोलनबाट आफूले विकृति र विसंगतीको विरुद्ध बोल्न सिकेको बताउँदै आफू संलग्न भएको नागरिक समाजले गत स्थानीय चुनावमा देशभर १६५ जना स्वतन्त्र उम्मेदवार उठाउने निर्णय गरेता पनि विजयी हुने सम्भावना देखिएकोले आफूहरु पछि हटेको वताएका थिए।
मल्टीपार्टी डेमोक्रेसीलाई बलियो बनाएर, विद्यमान भ्रष्टाचारलाई अन्त्य गर्न, महंगो निर्वाचन प्रणालीलाई विस्थापित गर्न र आफूले उठाएको एजेण्डालाई स्थापित गर्न नेश्नलिष्ट पिपल्स पार्टी प्रवेश गरेको पार्टी प्रवक्ता सिलवालले वताएका थिए।
एकदिन अघि मात्र नयाँ पार्टीको सदस्यता लिएको पार्टी प्रवक्ता सिलवालले असार लागि सक्दा पनि जनताले मल नपाएकोमा घोर आपत्ति जनाउँदै मल्टिपार्टी डेमोक्रेसीमा राजनीतिक प्रणालीलाई चिर्न नागरिक समाज नेश्नलिष्ट पिपल्स पार्टी मै समाहित भएको जानकारी दिएका थिए।
अहिलेको निर्वाचन प्रणाली जनतालाई जोगी बनाउने भएको समेत दाबी गर्दै प्रवक्ता सिलवालले भने, ‘संदसदीय व्यवस्थालाई अझै १० वर्ष टिकाइराख्ने हो भने नेताहरु थप गरिब हुँदै जान्छ। निर्वाचन प्रणालीले समाज रुपान्तरण गर्न सकिदैन्। भन्ने हाम्रो विचार हो।’
कार्यक्रममा बोल्दै पार्टी प्रवक्ता सिलवालले नेश्नलिष्ट पिपल्स पार्टीको कृषिमा क्रान्ति गर्ने भन्ने धारणा आफूलाई मन परेको वताउँदै मुलुकले १० वर्ष हिंसात्मक आन्दोलन पनि थेग्न परेपनि जनतालाई रत्तिपनि फाइदा नभएको उनले जिकिर गरेका थिए।
नेपाली जनता जहिले पनि प्रयोग मात्र भएको उनले टिप्पणी गर्दै नेश्नलिष्ट पिपल्स पार्टीले किसानलाई उत्पादन गर्न प्रोत्साहित गर्ने र उनीहरुले उत्पादन गरेका तरकारी बजारीकरण गर्ने स्पष्ट पार्दै नेपालमा चाडै नै श्रीलंकामा जस्तो आर्थिक मन्दीको अवस्था नेपालमा आउन सक्ने भन्दै चिन्ता समेत व्यक्त गरेका थिए।
त्यस्तै, संगठन विभागका प्रमुख कान्तबहादुर पौडेलले गत फागुन १५ गते पार्टी विधिवत रुपमा निर्वाचन आयोगमा दर्ता भएको जानकारी दिएका थिए। उनले जनता र नेताको बीचमा खाडल देखिएको भन्दै पुरानो पार्टीको विकल्पमा आफूहरुले पार्टी स्थापना गर्नु परेको वताएका थिए।
संगठन विभागका प्रमुख पौडेलले जनताको जनचाहाना, जनभावना र राष्ट्रको उन्नतीको लागि नेश्नलिष्ट पिपल्स पार्टीको समाजसेवाको लागि स्थापना भएको दाबी गरेका थिए ।
केन्द्रदेखि वडासम्म पार्टीको संरचना रहेको पनि उल्लेख गर्दै उनले १३ लाख ६२ हजार सदस्य आफ्नो पार्टीमा रहेको समेत उनले दाबी गरेका थिए भने विस्तारै ६५ लाखको हारहारीमा पदाधिकारी र कार्यकर्ता बनाउने लक्ष्य पार्टीको रहेको संगठन विभागका प्रमुख पौडेलले बताएका थिए ।
आफ्नो पार्टी अबको चुनावमा चुनावी मैदानमा जाँदा स्पष्ट बहुमतको पार्टी बन्नेमा आफू विश्वस्त रहेको वताउँदै पौडेलले धेरै पार्टीमा महिलालाई स्थान नदिएको भन्दै आफ्नो पार्टीले महिला सशक्तिकरणका कार्यक्रम अघि बढाएको समेत दाबी गरेका थिए।
संगठन विभागका प्रमुख पौडेलले भने,‘ हाम्रो पार्टीले ५३ प्रतिशत कोटा छुट्ट्याइएको छ।’ महिलाहरु आफ्नो पार्टीमा पुरै स्वतन्त्र र सुरक्षित भएको उनले बताउँदै पार्टीको ७७ जिल्ला संगठन र ६० जिल्लामा गठन गरिसकेको उल्लेख गरेका थिए।
त्यस्तैगरी, पार्टी कोषाध्यक्ष रोहित थापाले पार्टीले तयार गरेको पद्धती र निस्किएका उपजहरु देशवासीहरुमा पु्रयाउने प्रतिवद्धतामा जाहेर गरेका थिए।
गत २० वर्षमा देशमा धेरै परिवर्तनका कुरा आएपनि परिणाम भने जनतामुखी नभएको बताउँदै धेरै दलका कुरा अक्षरमा मात्र सिमित भएको आरोप उनले लगाएका थिए । अब आफ्नो पार्टीले बोकेको जनताका असली मुद्दालाई अक्षरमा मात्र सिमित नभई कार्यान्वयनमा प्राथमिकता रहेको पार्टी कोषाध्यक्ष थापाकाे दाबी थियाे।
